Maharashtra sorkar atema Sharad Pawar-i Sonia ajuru

New Delhi, Yimpoksüi/November 18 (Agencies): Maharashtra nung sorkar akümtsü atema Hombarnü New Delhi nung NCP tongti, Sharad Pawar-i Congress Tir, Sonia Gandhi’er ki 10 Janpath-i oa la den senden amen.
State nung sorkar akümtsü atema Uddhav Thackeray-i aniba Shiv Sena yaritsü atema NCP-i Congress den jembishinüdar.
Tesüiba anogo ishika Congress aser NCP lenirtemi Maharashtra nung Shiv Sena leniba nung sorkar akümtsü atema senden aika mena arudar.
Sonia Gandhi den senden amentsü lia Pawar-i, Maharashtra nung sorkar kümner yimtenren party ajaki pei lenmang shimtsüla, ta ashi.
Asükwa mongpu Parliament senden tenzüktsü lia osangbenertem den jembidang Pawar-i, “BJP aser Shiv Sena nati longjemer toktep aser (NCP) o Congress nati longjemer toktep. Parnoki par lenmang shimtsü akok aser onokia ozü tangatetba nung inyaktsü,” ta ashi.
State nung sorkar mekümtetba ajanga Angh-i November 12, 2019 nü state nung President’s rule benoka liasü.
Yashi Pune nung NCP core committee senden amenba sülen tanü Pawar-i Sonia ajurua senden amener. Iba senden nung lenir anati state nung President’s rule ya agientsüla aser sorkar akümtsü atema lenmang lapoktsütsüla ta bangjema liasü.
State assembly election nung BJP aser Sena teloktepi menden 105 aser 56 angu, ajisüaka Chief Minister menden dak sendakba nung iba teloktep raksa.
Kasa election nung Congress-i menden 44 aser NCP-i menden 54 angu.