Maharashtra sorkari aluyimertem dang sentsüh atoktsü sangdongogo

New Delhi, June 11 (Agencies): Deobarnü Maharastra state sorkari aluyimertem dang parnoki sen apua aliba sentsüh atoktsü telemtetb agia iba osang sangdongba sülen aluyimertemi longkak aittsü sentong yanglua aliba thiogo.
Tanü osangbener den jembidang aluyimertem lenir, Rahu Shetti-i, “Loan agiba sentsüh atoktsü atema sorkari nangzükogo, aser tanga takhangbatema ataloktsütsü ta nangzükogo. Parnoki nangzükba ama meinyakra onoki ano July 25, 2017 nungi tenzüka longkak aittsü,” ta metetdaktsü.
Tanep longkak aiter aluyimertemi chief minister Devendra Fadnavis-i tentetba minister tem committee ka ajurua senden mena liasü.
Maharashtra nung aluyimertemi tesüiba anogo 11 tashi takhangba agüja arua liasü, aser parnok takhangbatem mataloktsüra parnoki June 12 nungi longkak tesashiba aittsü, ta amokmerena liasü.
Aluyimertemi state sorkar dang akhangba onüktem rongnung: farm loan sentsüh atoktsü, parnoki züngsentetba chiyungtsütem atema jenjang shitak agütsütsü, tzü mesür arutsü atema senotsü teyari agütsütsü, arishi küm 60 dak temapur aluyimertem nem pension agutsütsü aser MS Swaminathan Committee tentettsü densema lir.
Taoba hopta Maharastra nung aluyimer million tesadang kati item takhangba agüja longkak ait tenzüka liasü, aser iba mapang nungi aluyimer pongu tashi süogo.