Maharashtra sorkari aluyimertem takhangba agizükogo: Fadnavis

AIKS-i ayongzüka aluyimertemi anogo troknü ashi tetsüng agi jaja takhangba balala agutsüba sülen tanü Mumbai nung tatembangbuba sentong nung adenba noksa nung angur. 

Mumbai, Metsüremi 12 (Agencies): Maharashtra state tesem balala nungi aluyimertemi parnok dang sentsüh atoktsü densema onük balala nung takhangba agüja anogo troknü tashi tetsüng agi kilometer 180 dak tema jajar yashi Mumbai yimti tonga liasü, aser iba mapang nung yimti nung alirtemi parnok pelaa agizük.
Yimti nung alirtemisa parnok nem amtsük aser tzü agutsü, ano karibo parnok nem tsüngsem lema agutsü.
Aluyimer 50,000 shi Nashik nungi tetsüng agi arudang aika junga mechiyung aser moapu nung dang mejanga liasü aser tesüsa parnok belemkanger Mumbai tonga liasü.
Parnoki Mumbai kübok Sion nung anenzük, aser tanü Azad Maidan-i aotsü sentong liasü, saka state sorkari mepishiba ajanga parnoki aonung ang Azad Maiden jagi aotsü lemtet.
Tanep Chief Minister, Devendra Fadnavis-i, aluyimertem aser tribals-i akhangbaji sorkari süoki ia agizüker, aser parnok akhangba timbaka agizükogo, aser ibaji parnok nem shidi ajanga metetdaktsüogo, ta metetdakja liasü.
Tanep Assembly nung Opposition lenir, Radhakrishna Vikhe Patil-i tasüngdangba ka asüngdangba mapang nung CM-i iba telangzübaji agüja liasü.
State nung aluyimertemi akhangba tongti onük anaji- parnok dang loan khenyongi atoktsü aser electricity bills atoktsü. Iba dak alia alu nungi züsentetba aonsotsü balala atema jenjang junga latettsütsü aser Forest Rights Act mapa küma inyaktsü atema aluyimertemi akhanger.
Maharashtra state sorkar nung BJP den teloktep, Shiv Sena aser MNS nati aluyimertem sentongji nungittsü ta meetdakja liasü; ano Congress Party Tir, Rahul Gandhi aser social activist, Anna Hazare natia aluyimertem pusema jembiba den külemi state sorkar aitsüogo.
Tanü Congress Tir, Rahul -i Maharashtra nung aluyimertemi longkak aitba ya ‘nüburtem tashi’ tatishitsü ka lir, ta shia Ato kilonser, Narendra Modi aser chief minister, Fadnavis na dang mezümeküma malitsüla saka aluyimertem tim takhangbaji agizüktsüla, ta jembi.