Maharashtra sorkari Amitabh Bachchan nübo aginür

Mumbai, March 21 (Agencies) : Amitabh Bachchan-i keyi kümzüktsü atema inyakba sentong nung shilem agiba sülen Maharashtra sorkari pa ‘Save the girl child’ maparen indang brand ambassador inyakdaktsünür.
“Onoki pa iba sentong asoshi brand ambassador inyakdaktsünür. Iba sentong ajanga tetsür tanur tepok nung bena lia raksaba inyakyim nokdangtsü aser tetsür chanutem kümzüktsü” ta Health Minister Deepak Sawant-i ashi.
Tawa Sangli nung nija mozüki ka nung tetsür tanur 19 raksa endokba rema aliba anguba sülen senden ka amendang Deepak-i iba osang metetdaktsü.
“Sorkari tanur tepok nung bena lia tendangba nokdanga ozüngtem yanglua amshir. Ajisüaka, arrtsü anasa aliba state tem- Karnataka, Gujarat aser tangalen iba mapa inyaker aser Maharashtra nung tanur raksa endoker. Iba asoshi onoki tanga state tem dangia shidi züluogo” ta paisa shisem.
“Tetsür tanur kümzüka ayutsü indang osang tali prokshitsü atema sorkari Amitabh Bachchan dang brand ambassador ka ama iba sentong nung shilem agitsü mepishitsü” ta Maharashtra Health Minister-isa metetdaktsü.
Iba senden nung Additional Chief Secretary (Health) Vijay Satbir Singh, Family Welfare Commissioner Ramesh Devkar, Director Health Satish Pawar, State Women`s Commission President Vijaya Rahatkar aser tanga tongti ketdangsertem aden.
Amitabh Bachchan-i iba temepishiba agizükra, pai Maharashtra nung tang agi tasembenbuba atema brand ambassador inyaktsü. Taoba mapang pai keyi aser tuberculosis atema brand ambassador inyakogo.
Amitabh-i tanga nija teloktem atema ambassador inyakba dang masü saka pa Gujarat atema tourism brand ambassador aser India sorkar indang pulse polio campaign atema ambassador inyaker.