Maharashtra state nung nashi shi nokdangba ozüng Aug 19 nü angadangtsü

Mumbai, August 07 (Agencies): Maharashtra sorkari state nung nashi shi nokdangba ozüng benoka alibaji August 19, 2015 nü angadangtsü asoshi tanü Bombay high court-i lemtetogo.

Justice V M Kanade aser Justice Burgess Colabawalla nati ashiba agi, High court-i temepishibaji telemsa ana kümer angadangtsü. Mezüngbubaji Maharashtra Animal Preservation (Amendment) Act kübok section 5D anema benokba temepishiba angadangtsü, koba ajanga nashi shi alizüka bener aruba aser nashi shi bena alibaji ozüng alema, ta latetja lir. Iba temepishibaji August 19 nü angadangtsü. Iba sülen HC-isa ozüng ajunga nungji linük Temzüng indang temepishiba benokba angadangtsü.

Maharashtra Animal Preservation (Amendment) Act ya taküm February ita nung Tir-i agizük aser state sorkari March ita nung metetdakja liasü. Iba ozüng ajanga tamalen nashi tepsetba nokdanga aliba den jang tepsettsü-a nokdanger.

Nisung kari danga nashi shi ayokba mesüra bena lia pura küm pongu tashi-a tepouktak ayutsü aser sen 10,000 senchi achitsü.