Maharashtra tzüyim nung Engineering kaketshir 8 arakset

Bengaluru, April 15 (Agencies): Honibarnü Maharashtra state kübok Sindhudurg district nung aliba Vayri tzüyimkülen Arabian tzüyim nung Karnataka nung aliba engineering college ka nungi kaketshir ti arakseta süogo, ta police-i metetdaktsü.
Belgaum nung aliba Maratha Engineering College nungi kaketshirtemji tzüwatsü atema tzüyimi oa liasü.
Südoksenemi aoer kaketshir parnok 47 nungi asürtemji tetsür asem aser tebur pongu liasü.
Parnok rongnung nisung 30 tzü awai ao, aser parnok rongnungi nisung asem kümzük aser nisung 19 tzü wadanga tzükümi arutet, ta police-isa ashi.
Iba tatalokba ya tanü nikongdang Malvan jila anasa Vayri tzüküm nung atalok.
“Tzüsem tulu liasü saka kaketshirtemji tzü awai tzüyimi ao. Nisung kar araksetba ngur par telok nungi kar parnok kümzüki ao saka idangjibo kanga menor liasü,” ta police-isa ashi.
Tetsür asem densema tasümang ti ngutetogo, ta parnokisa ashi.
Osangbenertem den jembidang Sindhudurg Superintendent of Police, Amogh Goankar-i, “Kaketshir asem tasü-taküm na tsüngda tzüküm tonga anir aru. Nisung ana Malvan nung aliba hospital ka nung lir aser tetsür ka Oros nung aliba hospital ka nung lir,” ta ashi.
Yaküma February ita nung Pune nung aliba college ka nungi Mumbai anasa Murud tzüyimküm nung kaketshir 13 arakseta süa liasü.