Maharasthra-i sen Cr 100 takoksa angutsü: Anurag

Mumbai, April 09 (Agencies): Maharasthra nung Indian Premier League (IPL) cricket asayamong masayaba ajanga Maharasthra-i sen crore 100 shi takoksa angutsü ta Board of Control for Cricket in India (BCCI) nung Secretary, Anurag Thakur-i tanü, Honibar nü metetdaktsüogo.
“Tajemtsü tzü peria mongui aliba Maharasthra state nung IPL masayatsü lemtetba ajanga takoksa kecha bener marutsütsü,” ta Maharasthra Chief Minister, Devendra Fadnavis-i sangoktsür anogo ka lir külen arishi küm 41 tain Anurag-i tanü iba olenji metetdaktsür lir.
“Taoba IPL asayamong dak ajemdaker Maharasthra-i sen crore 100 tajangzük anguba osang BCCI-i bushitetogo. Iba senji amshia, Maharasthra sorkari tajemtsü tzü peria mongui aliba timtem agientsü mapatong inyaktsü akok,” ta pai shisem.
Mumbai, Pune aser Nagpur densema, Maharasthra nung IPL asaya 18 tashi asayatsü ayonga lir.
Ajisüaka, tajemtsü tzü peria mongui aliba mapang ka nung IPL asayadak anepalutsü asoshi tzü litre lakh 60 shi nungdakba osang bushitetba sülen IPL asayatemji Maharasthra masü saka tanga state nung ang asayadaktsütsü onük benoka lir.
Iba onükji Bombay High Court-i tan April ita 12 nü angadangtsü asoshi anogo latetogo.