Maharastra nung helmet masemer dang totzü mayoktsü

Mumbai, July 21 (Agencies) : Traffic ozüng tali tashi itshitsü atema Maharashtra sorkari gari tetsüng ana aliba talongtsü anishirtem helmet masemertem dang totzü mayoktsü, ta Hokolbarnü metetdaktsü.
State legislature nung iba osang metetdaktsüdang Transport Minister Diwakar Raote-i, iba inyakyim ya gari lenmang nung yiruyipong lendong atalokba ajema kümdaktsütsü mechi tenzüker, ta ashi.
“Helmet masemer dang totzü ayokbaji helmet mesemi talongtsü anishitsü ajungshiba den saku lir,” ta pai sangdong ka ajanga metetdaktsü.
Mumbai police-ia August 1, 2016 nü nungi yimti nung ‘No Helmet, No Petrol’ inyakyim tenzüktsü ta tawa metetdaktsüogo.
Gari lenmang nung gari tetsüng ana atenba talongtsü anishirtem yiruyipong lendong onsara atalokba agi Mumbai police-i totzü ayokertem den angatetteper helmet masemertem dang totzü mayoktsü lemtet.
Ita ana tejakdang police-i gari tetsüng ana aketba talongtsü nung tesülen amenertema helmet asemtsü ozüng agütsüogo aser lenmang nung gari lendong nungi kümzüka alitsü atema tesayuba kar agütsüogo.
India nung yaküm gari lendong 501,423 atalokba nung nisung 146,133 tashi taküm samaogo. Lendong atalokba rongnung 144,391 bo gari tetsüng ana aketba talongtsü liasü aser item lendong nung nisung 36,803 tashi asü.
2015 küm India nung aliba state tem rongnung gari tetsüng ana aketba talongtsü lendong atalokba timtibaji Tamil Nadu sülenbo Maharashtra liasü.
2015 küm yimtitem rongnung kodang reprangdangdir gari tetsüng ana keta aliba talongtsü timtiba lendong ajurubaji Mumbai nung liasü. Mumbai nung yaküm item talongtsü lendong 23,468 tashi atalok, ta Union Transport Minister Nitin Gadkari “Road Accidents in India: 2015” osang agütsüba mapang metetdaktsü.
Raote-i Helmet masemer dang totzü mayoktsü osang metetdaktsüba sülen Mumbai nung aliba petrol-diesel ayokdak tesem 500 dena Maharashtra rangben nung totzü ayokba tesem 4,100-i iba ozüng tasen mapa küma amshitsü imlar.