Mahatma asoba anogomong nung Tir, PM-i akhüm agütsü

Delhi, October 02, 2016: Linük tebuti, Mahatma Gandhi sor küm 147 ajungba anogomong nung Tir, Pranab Mukherjee-i Mahatma Gandhi memorial nung asür nem akhüm agütsüba noksa nung angur. Kasa noksa nung Urban Development, Housing & Urban Poverty Alleviation and Information & Broadcasting Union Minister, M. Venkaiah Naidu-a angur.

New Delhi, October 02 (Agencies): Linük tebuti, Mahatma Gandhi sor küm 147 ajungba anogomung nung Tir, Pranab Mukherjee, Ato kilonser, Narendra Modi aser tangar lenirtemi Delhi nung aliba Gandhi indang memorial nung naro tokja asür nem akhüm agütsüogo.
Linük tatong Tir, Hamid Ansari, taoba Ato kilonser, Manmohan Singh aser BJP lenir tain, L K Advani nungeria Mahatma nem akhüm agütsü.
Ato kilonser, Modi-i twitter ajanga, “Gandhi-i iba lima ya nisung alitsü atema tesem tajungba ka kümdaktsü. Pa tangatetbatem, sensakertem atema nendaka inyakba aser tim masüba anema raraba ajanga (asenok) ajungmesor,” ta ashi.
Tanep 7:40 ako meta Modi-i Mahatma memorial nung kolab naro toktsüba sülen memorial ji longa asür nem akhüm agütsü.
Union Ministers- M Venkaiah Naidu, Rao Inderjit Singh aser Congress lenir, Ghulam Nabi Azad nungeria linük tebuti nem akhm agütsü.  Delhi Chief Minister, Arvind Kejriwal, deputy chief minister, Manish Sisodia den linük balala nungi ambassador tem, tongtibang nisungtem aser kaketshirtemi asür nem akhüm agüja sentong nung aden.
Iba sentong nungsa tamangba yimsü balalai sarasadema liasü.