Mahatma Gandhi ajanga ajungmesoa yangluba film 8

New Delhi, October 2 (Agencies) : Linük Tebu Mohandas Karamchand Gandhi dak sempet aika keta liasü aser pa taküm nung ajemdaker film aika yanglua lir.
Film shia nung dak aketba sempet balala sayur aser pa tebu ka, lennir ka, aser okatsür ka ama sayua lir.
Tanü pa tasoba anogo amungdang, Mahatma Gandhi taküm ajanga ajungmesoa yangluba film kar lemsateper.
Gandhi: 1982 küm film yangluba nung Ben Kingsley-i Gandhi ama shilem agir. Iba film ajanga Mahatma Gandhi-i British yimsüsüba nungi India nüjiso anguba dak sendakba tatalokbatem sayur. Iba film ajanga Oscars 8 aser tanga film awards 26 angu. Tanga sempetettem rongnung BAFTA, Grammy, Golden Globe aser Golden Guild awards nunger dena lir.
The Making of Mahatma: 1996 küm yangluba film ajanga Mahatma Gandhi indang taküm otsü rasa ashir. Pai British nunger den mezüng toktepba, Britain nung kin lemdanga amshiba, South Africa-i aoba, Sorkar den raraba aser India-i meyipa arubatem dena lir. Iba film nung Rajat Kapoor-i tongti shilem agi aser Best Actor (Silver Lotus Award) angu.
Hey Ram: 2000 küm sayaba film nung Saketh Ram kinungtsü tashiyim agi raksar tyepsetba sülen, pa taküm khenyongi melenshir aser pai Muslim nunger kwika tepsettetdir tepsettsü tenangzükba agir. Iba sülen Saketh Ram tanaben kibong akümer aser iba sülen Maharajah den ajuruteper aser tatem nung pai Mahatama Gandhi tepseter.
Lage Raho Munnabhai: Iba ya Munnabhai indang film tanabuba lir. 2006 küm sayaba Lage Raho Munnabhai nung Munnabhai-i Mahatma Gandhi indang tanela angur. Pai Gandhi indang tanela den sensaksemba ajanga Gandhigiri sülen anidaker. Iba film ajanga India indang sobaliba sayur aser India o US nung Gandhigiri yimya nung lungkak aitba sentong aika ajungmeso. United Nations nung mezüngbuba Hindi film sayubaji iba ya liasü. Lage Raho Munnabhai ajanga Filmfare, Screen aser Zee Cine award densema sempet 7 angu.
Maine Gandhi Ko Nahin Mara: 2005 küm sayaba film Urmila Matondkar-i Trisha Chaudhury ama shilem agir. Film nung Trisha tebu Anupam Kher-i pai Mahatma Gandhi tepset ta yiamata timtemer.
Gandhi My Father: 2007 küm sayaba film nung Gandhi aser par jabaso na indnag tesentaktep mejungi aliba sayur. Gandhi’er jabaso tambusang Harilal (Akshaye Khanna)-i tebu indang tekolok tajung sempet mangu saka ashikülaker aser tangar ashioktsür ka akümer. Iba film ajanga Gandhi-i par jabaso atema tebu tajung ka melitetba sayur. Tokyo International Film Festival nung Shefali Shetty-i iba film atema Best Actress Award angu.
Sardar: Iron Man of India: Vallabhai Patel ya Gujarat nung shishilembar takar kibong ka nung aso aser pai tetenzük nungbo nüjiso atema raraba nung shilem magi, Mohandas Gandhi lutsü aser pa dang Social Worker ta aja. Saka 1915 küm Mohandas-i Ahmedabad nung o jembiba angashia Vallabhai-i pa tangatetba melenshi aser nüjiso atema inyakba mapa nung shilem agitsü tetsüng ajemok. 1993 küm yangluba film ya Sardar Vallabhai Patel indang taküm otsü nung ajemdaker yanglu aser talisa 1945 nungi 1950 tsüngda pa taküm nung atalokbatem sayur.
Nine hours to Rama: Iba film ajanga Mahatma Gandhi tepsetsang Nathuram Godse indang taküm sayur. Godse-i Gandhi tepsettsü tasa atongba aser pa Hindu activist ka akümba sayur. Muslim nungertemi Hindu nunger meyirjang aika tepsetba atema Godse-i Mahatma dak tai tongloktsü. Stanley Wolpert-i züluba kaket ‘Nine hours to Rama’ nung ajemdaker 1963 küm iba film yanglu.