Mahatma Gandhi tesayubatemji asenok atema kanga tapet: Kovind

New Delhi, August 23 (Agencies): Putu ajak nung Mahatma Gandhi indang tesayubatem ya meimchirtem atema kanga tapet, pai asenok dang asen mapa ajanga tangar akhümtsübutsü sayu, ta tanü linük Tir, Ram Nath Kovind-i metetdaktsü.
Tanü New Delhi nung UNESCO Mahatma Gandhi Institute of Education for Peace and Sustainable Development (MGIEP)-i ayongzükba ‘World Youth Conference on Kindness’ sentong nung jembidang Kovind-i, “Tanü yimjung aser taremzüktep nüngdakba aser kiralongra den climate change ama tebilemtsü onük aika aliba mapang nunga Gandhi indang tangatetba/tesayubatemji kanga tapet,” ta ashi.
“Gandhi tsüngsü nung anidaka asenoki asen aser asen chinurtem tangar den tesendaktep yangludaktsütsüla. Kati ka angatettsü atema shisa lemsatepbasa tajungba, koba ajanga asenoki tangar majung bilemba koktettsü,” ta paisa ashi.
“Hopta ishika sülen October 2 nü asenoki linük tebuti (Mahatma Gandhi) sor küm 150 ajungbamong amongtsü. Pa tangatetbatemji asenok atema kanga tapet. Gandhi ya India nung aso ajisüaka pa ya meimchir ajak meyong liasü,” ta paisa ashi.
‘Vasudhaiva Kutumbakam: Gandhi for the Contemporary World: Celebrating the 150th birth anniversary of Mahatma Gandhi’ omen nung ayongzükba sentong nung Asia, Africa, Latin America, aser Europe nung aliba linük 27 nungi lanur 1,000 shi shilem agia dendar.