Mairaj-i 2016 Rio Olympics nung shilem agitsü

Lonato, September 17 (Agencies): Skeet shooter mongin, Mairaj Ahmad Khan-i tang Italy kübok Lonato nung tasayadak ISSF Shotgun World Championship indang tebur skeet tetoktepba final nung shilem agitsü jenjang anguba sülen 2016 Rio Olympics nung shilem agitsü jenjang ajangzükogo.
Tebur skeet finals nung shilem agitsü asoshi asayaba qualification round 3 tashi nung ajak agi points 74 angusang, Mairaj-i tanüngba round 2 nung kanga junga shilem agiba sülen ajak agi points 122 ngua final nung shilem agitsü jenjang angu.
Final nung shilem agitsü jenjang angur mezüngbuba prangpong kashishir 5 pronglai Rio Olympics nung shilem agitsü jenjang ajangzüka aliba yong 6 buba jenjang angusang, Mairaj-i Olympics nung shilem agitsü maongka ngua liasü.
Mairaj-i tan jenjang tajungji anguba sülen India tenüng nung shotgun tetoktepba nung shilem agir mezüngba prangpong kashishir akümer lir.
“Arishi küm 40 tain Mairaj-i jenjang tajung ngua India nem konang bener arutsüba atema kanga pelar,” ta Mairaj-i Olympics nung shilem agitsü jenjang anguba osang angazükba sülen National Rifle Association of India (NRAI) Tir, Raninder Singh-ia metetdaktsüogo.