Majakong Ward mesemteter küm tenem jungogo

Mokokchung, Oct. 17 (TYO): Mokokchung town kübok Majakong Ward mesemteter küm tenem (50) ajungba Hon Jubilee sentong ka “Jangyu Medem” omen nung ajemdaker Majakong Community Hall nung meraketa mungogo.
Tanü iba sentong nung tongti tesemdanger Social Welfare Parliamentary Secretary, Merentoshi R Jamir-i jembidang, Mokokchung district mozüki ya iba ward nung amenoka lir, yangi Mokokchung nüburtem dang masü saka kin tapu balala taneptsü bushia arur, anungji iba ward nung alirtemi bendangertemji koma anepalur, ta asüngdanga ashi.
Yangi aliba mozükitem ya sorkar meyong lir, aji saka, yangi alir ka ama asenokia koba tashi mozükitem renlokba nung shilem agir, ta paisa tangar dang nungi khuret talila lidaktsünüba olen ka ashi.
Tanü alima ya kanga kara aoba mapang ka lir, anungji, tangalen koma alima renloka aor, yamaji asenoka jangyu medema aotsübaji kanga tongtibang lir, ta paisa ayongzüka ashi.
Tanü Naga nunger solution atema sashia jembir, solution-ji asenok lungjema alinung dang arutsü. Iba keno ya “telungpur kisüng khuret masü aser state sorkar kisüng khuret a masü, saka asenok ajak khuret lir”, ta paisa ashi. Naga nunger tejakleni mera aotsü atema tang rongdak nüngdakji “telungjem” lir, ta paisa shisem.
Taoba mapang tsürabur shirnokisa iba ward tejakleni aotsü nükla nung maparen balala inyakogo, parnok nem tenüngsang agütsür, aser ano tang alirtemi lanu putu asoshi kechi mangdang yutsür ta asübaji kanga tongtibang lir, ta paisa inyakdaktsünüba ka ashi.
Jubilee ya asenoki züzüa mungra, iba nungji kecha tajangzük malitsü, aji saka, tarutsü asoshi nükla yur mungra iba nungji temoatsü lir, ta paisa ashi.
Sentong nung tongti o jembir tsürabur M. Bendangnükshi Longkumer-i omen dak ajemdaker tensa den apet tagitsü onük jenti bener arua tesentepertem ayongzüka liasü. Hon jubilee nüngtem nung adokba nüngo kaket ka IMDH Medical Superintendent Dr. Medem-i sayatsü.
Iba sentong nung Ungma Village Council, Mokokchung Village Council, Majakong ward nung razüka aoba Artang ward aser Lijaba Lijen ward nungi yimsüsür aser ward tenzükertemi tepela o tatsütsü jembi. Majakong Ward chairman Marchiba-i jubilee tayongzükba o aser Jubilee Planning Committee convener Bendang Jamir ajanga melepzüng o jembia liasü.
Majakong Watsü Telen-i jubilee naklu ken ka aser temeja ken ka Majakong nung alir Sumi kintsürtemi aten. Iba sentong Mokokchung Town Baptist Arogo Assoc. Pastor, Bendang Jamir den sarasadema tenzük aser Chang Baptist Arogo Mokokchung Pastor, Ngaku Chollen den sarasadema tembang. Tanü iba sentong nung Mokokchung town kübok ward balala nungi yimden tenzükertem arua aden.