Majuli asetkong nung aliba shitsütem miim chisem asütsü

Guwahati, January 23 (Agencies): Jorhat district, Majuli asetkong nung aliba Kamalpur yimtak, Kamalabari nung Honibarnü shitsütem nem chana o miim na meyokteper chidaktsüba sülen tajemba agi shitsü tebong tain ana sür lia angu aser pongu tashi temang mejungi lir.
Shitsü tasü anaji iba tesem nung aliba nisungtemi tama angu. Shitü tasü anaprongla tebang nung poja liasü, ta Majuli Forest Beat Officer, Atul Das-i ashi.
Tesem ka nungdang shitsü ana külemi süa aliba ngua onoki item shitsü nem miim chidaktsü südi ta temulung melemi bilemer aser yamaji mesüra machitsü chiyungtsü kar chisem asütsü, ta Das-i ashi.
Ano iba ama tasüba lir mali metettsü atema onoki metre 500-700 tashi bushidanga aoba mapang mamangtsüka shitsü pongu tashi süngdong ka nung mena liasü aser parnok tereprangtsü kanga anüalemer liasü.
Onoki parnok yamaji yutsür ao saka parnok koma lirar ano asüngnep khen oa reprangdangtsü aser langka danga tai lira onoki metettsü, ta Das-i ashi.
Onoki sür aliba shitsü ana indang tasümang sensa-a reprangtsü asoshi bener oa Jorhat-i shilem kar yokogo aser Hombarnü osang tejangja angutsü, ta pai ashi.
Kamalpur, Kamalabari ya shitsütemi kanga timtem agütsüba tesem ka lir. Iba tesem nung nütsüng yongsük 3,000 shi lir. Yangji aliba nüburtem küm ana shi item shitsü yagi kangsa lakteta timtemdakja arur.

You must be logged in to post a comment Login