‘Make in India’ masü ‘Make India’ mezüng asütsüla: Kejriwal

New Delhi, September 27 (Agencies): Ato kilonser Narendra Modi indang yimyim aser par sorkari benokba mapatong ‘Make in India’ aitsüba dak sentakba nung tanü AAP tongti lenir aser Delhi Chief Minister Arvind Kejriwal-i, ‘Make in India’ nükjidongji India meyangluibo mataloktsü, ta ashi.
Kejriwal-i, “Make India” atema AAP sorkari nüburtem atema benoka inyakba mapatongtemji kanga tongtibang, ta ashi.
“Asenoki India tama yanglushira ‘Make in India’ ji ataloktsübasa. Make India tetezü anema alibaren, shisaliok, tzü, kümzüka alitsü, ochi temeten aser terenlok mapatem nung sen intoktsüla,” ta tanü Kejriwal-i twitter ajanga ashi.
Kodang asenoki ‘Make India’ ataloktsüdir idangyongjisa alimai ‘Make in India’ sülen anidaktsü, ta Delhi Chief minister-i ashi.
“Asenok atema tongtibangtibaji nüburtem lir. Parnok dak sen intokang, aji süra alimai asen sülen anidaktsü,” ta paisa ashi.
‘Make in India’ ya investor tem atsüer aruteta India nung sen intoka osettsüset balala yangludaktsütsü atema Modi-i tenzükba mapatong ka lir.
Kejriwal-isa Delhi nung dengue tashitak nokdangtetba atema AAP züngsemtem nem tenüngsang agütsüogo.
Yashi AAP-i sangdong ka ajanga, dengue tashitak atema gol 40 aliogo aser ibaji Delhi tesem balala nung amshitsü, ta metetdakja liasü.
“Dehli yimti yimdong nung nüburtemi dengue anema raraba nung AAP züngsemtemi yariba atema ni nüma atanger,” ta AAP lenirisa ashi.

You must be logged in to post a comment Login