‘Make in India Week’ sabang nung mi adok; Bushisüngdangtsü tuyuogo

‘Make in India Week’ sabang nung mi adok; Bushisüngdangtsü tuyuogo

Mumbai, February 14 (Agencies): Deobar nikongdang Mumbai, Girgaum Chowpatty nung ‘Make in India’ Week sentong agiba sabang nung mi tulu adokba tatalokba kuli bushisüngdangtsü atema Maharashtra Chief Minister, Devendra Fadnavis-i tuyuogo.
Osangbenertem den jembidang Fadnavis-i, “Bushisüngdangtsü tuyuogo, ‘Make In India Week’ tanga sentongtem nungbo timtem madoktsü,” ta ashi.
“Mi adokba kuli tang tashi nung mejangja; nisung asüba mesüra yiruba mali,” ta paisa ashi.
Maharashtra CM-isa twitter ajanga, “Tia maka tatalokba atema akhümtsübua aliba Ato kilonser Narendra Modi-i kü den phone ajanga jembiogo aser India sorkari nüngdakba teyari ajak agütsütsü ta shiogo,” ta metetdaktsü.
TV noksa nung miji sentong aliba sabang telung nungi adok. Mi mezüng adokdang shilem agirtemji sabang nung tsüngsanga liasü.
Mi adokba mapang Fadnavis dak alia Shiv Sena tongti, Udhav Thackeray, Bollywood actor tem- Amitabh Bachchan, Aamir Khan, Hema Malini aser Vivek Oberoi nungera liasü. Iba tesem nungjagi nisung 20,000 shi ainshidaktsü.
Ajisüaka Fire brigade sepaitemi ghonda tesadang ka tsüngda miji ensep.
Osangbenertem den jembidang Fire Officer (Mumbai) tongti-i, “Mi adokba kuli onoki bushisüngdangtsü aser anogo ka ana tsüngda osang agütsütsü,” ta ashi.
‘Make in India Week’ ya alima linüktem dang India linüki purapiteta yanglutetbatem sayatsü aser India ya manufacture asüba tiyongtsü ka kümdaktsütsü atema ayongba sentong ka lir.

You must be logged in to post a comment Login