‘Make in India’ ya Japan nung mapatong ka kümogo: PM Modi

New Delhi, December 12 (Agencies): Tanü Honibar nü Ato kilonser, Narendra Modi-i, ‘Make in India’ ya Japan nung mapatong ka kümogo aser asetkong linüki iba atemaji senotsü US sen billion 12 lemzüktsüogo, ta ashi.
“Tanübo Japan nung ‘Make In India’ mapatong lir. Iba atemaji USD sen billion 11-12 lemzüktsüogo ta kü nem metetdaktsüogo. Iba ya ajanga linük anaprong tejakleni koma otettsü, iba temaitsüji sayur,” ta New Delhi nung India-Japan Business Leaders Forum nung jembidang Ato kilonser, Modi-i ashi.
‘Make in India’ ya India nung dang masü saka Japan nunga India mission mode nung odagi, ta pai shisem.
Modi-isa, tang mezüngsüa Japan-i India nungi gari alizüktsü, ta ashi.
“Maruti (Suzuki) yangi (India) yanglutsü. Japan company-i yangi yanglutsü aser Japan-i yoktsü,” ta pai ashi.
India aser Japan napronglai longjemer tejakleni aotsüla, high-speed train nung dang masü saka ‘high-speed growth’ nunga tejakleni aotsüla, ta pai ashi.
Taoba mapang pai Japan linük semdangba sülen Modi-i, Japan-i US sen billion 35 intoka shishilembatsü, ta ashi.
“Iba mapang nung iba sen jagi aika süngmangogo, ajisüaka tanübo mapang tatsüka tsüngda terenlok kanga kaogo,” ta pai ashi.
Modi-i temelenshi bener arutsüba tenüngsanga Japan Ato kilonser Shinzo Abe-i, “Ato kilonser Narendra Modi-i mapatongtem benokbaji Shinkansen (bullet train) ama lir aser pai benokba onüktemji Shinkansen ama lendong mataloktsüsa lir,” ta ashi.
Abe-isa, Japan nunger sen intoka shishilembatsü atema India ya tesem tajung ka kümogo, ta ashi.
Rongsenkettsüng dak sentakba nung Japan lenir Shinzo Abe-i, linük anapronglai kanga tongtepareta inyaktsü, kechiyong ibaji ajanga linük anaprong tajangzük angutsü, ta ashi.
“Tashi tait Japan ji India atema nüngdak aser tashi tait India ji Japan atema nüngdak. Linük ana tsüngda rongsenkettsüng nung tesentaktepji teti atema asütsü, ta ni amanger,” ta Japan Ato kilonserisa ashi.
2014-15 küm linük ana tsüngda shishilembabaji US sen billion 15.51 liasü aser 2013-14 küm US sen billion 16.29 liasü.