Maksü bena arurtem tepseta entokba anentsüla: Sharmeen

New Delhi, February 5 (Agencies): Pakistan nung küm shia maksü bena arur tetsür meyirjang aika kahseta, lenseta, rongseta aser onseta südaktsür, ta Pakistan nungi Academy Award mezüng angula, Sharmeen Obaid-Chinoy-i ashi.

Lai yangluba documentary ka tan-a Oscar atema tenüng benok lir.

Pakistan tsür film yanglur, Sharmeen-i ashiba agi, item ama nisung tepeta meintoki merenshitsü asoshi ozüng ang tesashi ka ayu nung tajungba asütsü.

“Alimai repranga lia ni osang ka sangoktsüner. Pakistan nung maksü bener arur tepseta entokba yimya kanga sashia benshir ajisüaka iba yimya ya sobaliba aser tamangba yimsü den sentaktepa mali. Anungji linük ka ama Pakistan nung Anti-Honour Killings Laws (Criminal Laws Amendment) Bill 2014 yanglushira ibaji ajak dang nungi takok tulubaji asütsü,” ta Obaid-Chinoy-i IANS dang e-mail interview ka nung ashi.

Lai yangluba, “A Girl in the River: The Price of Forgiveness” film ya Saba Maqsood indang otsü lir. Saba ya tebur ka den meimtepba liasü aser ibaji aibelen tulu amai züngshi. Kinüngertemi memulungi lai meimba tebur ka den meimtepa kibong akümba atema kahseta entoktsü aliba nungi jenbur külen ochi obendang bushiba iba film nung angur.

Iba film ya Oscars 2016 atema benokba sülen nungi Pakistan sorkar tera ajungmesogo.

Obaid-Chinoy tenüng sanga salem lemsatepba mapang Pakistan Ato Kilonser Nawaz Sharif-i linük nung tapet temzüng ozüng yanglua iba ama tansütsü ozüng samadaktsütsü meranga inyaktsü ta lemsatepogo.

Obaid-Chinoy-i, “Pakistan nung 2015 küm maksü bena arur tepsetba osang tejangja mali, ajisüaka 2014 nungbo nisung 1,005 tepseta entokogo. Teburia tepseta entoktsü alangba tai mena’er ajisüaka tetsür anga tali shisanga tepseter,” ta ashi.

“Tetsür ka takümji tangari lemtetba nung dang anidaktsüsa akümer anungji Saba indang ochiba otsü metetdaktsütsüji kanga nüngdak. Iba otsü ajanga alima nung tetsür ka taginübatem aika meteter, ta lai ashi.