Malala Yousafzai-i Canada parliament nung jembitsü; La nem honorary senso agütsütsü

Ottawa, April 4 (Agencies) : Nobel Prize angur rongnung tanutsütila Malala Yousafzai-i April 12, 2017 nü Canada parliament nung o jembitsü aser 2014 küm telemtetba ka nung melaa aliba ama la nem honorary Canada senso asütsü temeten official süa agütsütsü, ta Canada Ato Kilonser Justin Trudeau-i metetdaktsü.
Justin Trudeau-i, “Malala Yousafzai-i linük semdangtsü indang osang kanga pelaseta metetdaktsü. Lai tasü ita la amokmerenertem nem telangzüba agütsüba aser tetsür nem kaketshisatsü peria agütsütsü atema bendanga agüja inyakba ajanga alima tesem ajaklen nüburtem aika kanga ajungmesogo,” ta Hombarnü sangdong ka ajanga metetdaktsü.
“Lai mapa ajak la akhüm tsübusa bendanga agüja inyakteter. Ni la nem honorary senso temeten agütsütsü nema tanga bilemer. La Canada Parliament nung o jembir rongnung tanütsütila asütsü aser la arua o jembitsü yongyaseter,” ta Trudeau-i ashi.
Trudeau-i Malala den ajurutepa kaketshisatsü ajanga tetsür nem tashi agütsüba indang aser parnoki pei lokti aser linüktem nung kechi koda terenlok mapatem nung maneni shilem agitettsü item indang jembitsü.
Malala-i tetsürtem nem kaketshisatsü agütsütsü aser school-i yoktsü asoshi temai adoka parnok temeten atema jembitsü tenzükba sülen nungi la Taliban telungpurtemi arishitsü tenzük.
Iba sülen la International sabang nung tetsürtem kaketshisatsü nüngdakba aser tetsürtem temeten atema otongdar ka amai aküm.
Lai iba amaji bendanga agüja inyakba ajanga India nungi activist, Kailash Satyarthi den külemi la nema 2014 Nobel Peace Prize agütsü.
“Refugee tebilemtsü nung Canada-i ania kanga junga shilem agidar. Canada Parliament-i ni jaokba asoshi kanga nema tanga bilemer aser takoker jenti aliba linük ka semdangtsü kanga yongyaseter,” ta lai ashi.
Lai tetsürtem temeten asoshi bendanga agüja raraba ajanga October 2014 nung House of Commons-i la nem honorary Canada senso agütsütsü lemteta ayu.
Yousafzai ya honorary Canada senso angur trokbuba lir. Tangar punguji Raoul Wallenberg, Nelson Mandela, 4buba Dalai Lama, Aung San Suu Kyi, aser Aga Khan nunger lir.