Malala Yousafzai-i Pakistan nung Swat Valley semdanger

Peshawar, Metsüremi 31 (Agencies) : Nobel Peace Prize naroküm angur rongnung tanutsütila, Malala Yousafzai küm pongu sülen tanü Küptoknü Pakistan nung lar tasoli Swat Valley tonga aruogo, ta osang ka ajanga metetdaktsü.
Tetsürtem nema shisaliok agütsüba jenjang ajungkettsüla ta nokdakba nung ajemdaker Taliban telungpurtemi la dak tekolak nung injang agi yirutsü.
Osang ajanga ashiba agi, sepai tanükertem peria yoka lia tanü anogo ka atema la aser lar tsüraburtem Khyber Pakhtunkhwa province kübok Swat district tonga aru.
La Circuit House nung anenzük aser iba tesemji meketa ozüng amshirtem peria yoka liasü.
Mingora kübok Makan Bagh nung lar ki aser lar school semdangtsü; iba denji külemi Shangla district nung tetsürtem azüngba school ka lai lapoktsütsü.
“Tang pelaba ama ni kodanga mepeladang,” ta Nobel naroküm ngutetla, Malala Yousafzai-i metetdaktsü.
Osangf ajanga ashiba agi, Pakistan nunger kar mepelai liaka lar taso yimkong nung alirtembo pelatepdagi.
Yashi Geo News den jembiba mapang arishi küm 20 tain Malala-i ashiba agi, la shisaliok azüngba renemer külen teti atema Pakistan limai meyipa arutsü sentong lir.
“Iba ya ozü lima asünung Pakistan limai meyipa arutsüji kü nükjidong lir. Pakistan nunger ajaki shitetba ama nia ozü lima nung kasa temeten lir,” ta Malala-i metetdaktsü.
Pakistan limai meyipa aruba aser tila tanurtem nem shisaliok agütsütsü lai mission inyakba atema laisa pelaba olen ka shisem.
La injang agi yirutsüba sülen Taliban telungpurtemi sangdongba osang ka nung ashiba agi, la taküm kümzükra ano tanaben la tepsettsü merangtsü.