Malala Yousafzai ‘UN Messenger of Peace’ akümtsü

Islamabad, April 8 (Agencies) : Nobel Peace Prize ngua alila, Malala Yousafzai UN nung ‘Messenger of Peace’ inyaker tanütsütila akümtsü. Iba mapa atema la Secretary-General Antonio Guterres-i shim.
La nem iba mapa nungloktsüba sentongji taruba hopta UN Headquarter nung agitsü.
“Lendong bang nungang süng takoksa ajurua mesasai Malala-i tetsürtem aser nüburtem ajak temeten atema masetshii bendanga agüja inyaker,” ta Yousafzai iba mapa asoshi shimba mapang Secretary-General-i ashi.
“Tetsürtem nem kaketshisatsü agütsütsü nokdangba maparen anema nokdaker bendanga agüja inyaktsü atema la dak tasü tait shisatsü keta aliba ajanga alima rangben nung nüburtem kangasa ajungmesogo,” ta pai ashi.
Paisa, United Nations nung ‘Messenger of Peace’ mapa atema alemi nungi tang tashi nung tanütsütila ka ama lai alima nem yimjung bener arutsüba tsütsü mapa tulu inyaktettsü, ta shisem.
Arishi küm 19 tain, Yousafzai ya alima nung ajaki metetba tetsür ka kümogo. Taliban kiralongrartemi tetsürtem kaketshisatsü angazükba nokdangba anema lai nokdakba ajanga la dak October 2012 nung tokolak nung injang agi akhaba sülen nungi lai tetsürtem nem kaketshisatsü agütsüba menokdangtsü atema nokdaktsü apuso.
Kaketshisatsü atema bendanga agüja inyaker, Pakistan tsürla iba injang agi akhaba nungi mesüi kümzük aser alima rangben nung kaketshisatsü mongui aliba tetsür million aika asoshi lenmang sayur tajungtila aküm.
2013 küm Yousafzai aser la tebu Ziauddin Yousafzai na senteper tetsürtem asoshi ‘Malala Fund’ lapoka.
La December 2014 nung Nobel Peace Prize angu aser tang tashi nung iba sempet angur rongnung la tanutsütila lir. La den külemi tanurtem temeten asoshi inyaker India nunger Kailash Satyarthi-a iba sempet angu.
Guterres-i shimba mezüng ‘Messenger of Peace’ ji Yousafzai lir.
UN nungi Messenger of Peace tem ya alima nung alir ajaki jangja meteter aser parnoki nüburtem temeten asoshi inyaker.