Malaysia civil aviation chief, Rahman-i mapa toktsür

Kuala Lumpur, Chiteni 31 (Agencies) : Malaysia Airlines tayimtsü, MH370 samaba indang bushisüngdangba report nung Kuala Lumpur nung aliba air traffic control center ajanga tamakok kar aludaktsüba indang shisema aliba nung ajemdaker, tanü Sangtennü Malaysia civil aviation authority tekolakbai pa mapa toktsüogo.
Küm pezü tejaklen nisung 239 mener Kuala Lumpur nungi Beijing yimti bushia oya aliba mapang samaba indang bushisüngdangba report-ji yashi Tentonü nüburtem dang metetdaktsüogo saka tebushitetba tasen kecha balakabo mali.
Report nung tayimtsü samabaji ‘aviation authority’ nem tongloktsüba indang shisema mali saka ‘standard operating procedures’ den jangyumedema meinyakteti ‘air traffic control’-i tamakok aludaktsüba indangbo shia lir, ta mapa toktsüba shity nung Azharuddin Abdul Rahman-i metetdaktsüogo.
“Anungji, kanga junga shisadanger külen sasaseta ni Malaysia Civil Aviation Authority mendenbuba menden toktsütsü mulungtetogo; ni tanü menden toktsüba shity agütsüba nungi anogo 14 sülen ibaji shidak mapa küma inyaktsü,” ta pai tezüluba nung agütsüogo.
Tapak 495 nung renema aliba report nung shia aliba agi, MH370 tayimtsüji nisung kari par tetuyuba nung tanga lenmangi anir ao südi saka itemji shirnoki inyakar parnoki mejangjatet.
‘Internal committee’ ka tentettsü aser tayimtsü samaba mapang duty nung alir air traffic controller-tem nem tapet temerenshi agütsütsü, ta parliament nung osangbener senden ka nung jembidang Transport Minister Anthony Loke-i metetdaktsüogo.
‘Modern aviation history’ nung tayimtsü kong sama mesüra komaser samar memeteti samaba temangmangtsü aketba otsü tulutibaji ibai lir.