Malaysia-i Rohingya khuret atema senden ka amentsü ayonger; Suu Kyi-i Bangladesh den olemteptsü atema ketdangser ka yok

Kuala Lumpur, January 11 (Agencies) : Organisation of Islamic Cooperation nungi foreign minister tem taruba hopta Kuala Lumpur nung Rohingya Muslim onük atema senden ka amentsü, ta Malaysia ketdangser kati ashi.
January 19 nü amentsüba senden nung OIC teshimtet nübo 56 shi adentsü ta imlar aser parnokji Malaysia Prime Minister Najib Razak-i anir adentsü. Tawa tu Razak-i Myanmar dang Rohingya Muslim nunger lokti tepsetba anentsü atema ayongzüka liasü.
Buddhist nunger teimba sür aliba Myanmar linük nung Rohingya nungerji kin ka ta agizüktsü memulunger. Myanmar-i parnokji Bengali nunger mesüra Bangladesh nungi aruba talidak makartem ta dang züngshir.
Ita asem tejaklen Myanmar army-i Rakhine state nung telungpurtem anema mapa inyaktsü tenzükba sülen iba tesem nungi Rohingya nunger aika linük toktsür jena aotsü tenzük.
Bangladesh linük nung jenokba Rohingya Muslim nungertemi ashiba agi, Myanmar sepaitemi Rohingya tetsürtem dak tashiyim mapa inyaker, nisungtem tepseter aser kiojen nung mi senokja rongdoktsür.
Item otsü ajanga Nobel sempet angur Aung San Suu Kyi’er sorkar asoshi tebilemtsü bener arutsüogo.
Myanmar sorkari item taitsüba onüktemji talila puraloka jembir ta ashir aser onüktem bushisüngdangtsü atema ‘special commission’ ka tenteta mapa nungloktsüogo.
Yaküm November ita Malaysia-i Kuala Lumpur nung Myanmar ambassador jaoka senden ka amen aser iba mapang Malaysia aser Rohingya nunger nisung 500 shi adenshia embassy kima lungkak ait.
Ano külen, Bodbarnü Myanmar lennir Aung San Suu Kyi-i Bangladesh den olemteptsü atema teshimtet nübo ka yokogo.
Rohingya khuret ajanga tesüiba ita asem tsüngda Myanmar nungi nisung 65,000 shi Bangladesh nung oa jenok ta United Nations-i ashiba mapang ka nung Suu Kyi-i iba mapa inyaker asütsü.
Myanmar nung deputy minister of foreign affairs, Kyaw Tin-i Bangladeshi yimtiba Dhaka nung anogo asemnü amungtsü aser iba mapang Rohingya indang khuret lemteptsü.
Nobel Peace naroküm angur Suu Kyi’er ita 9 sorkar atema iba ya tayongzükba tulutiba asütsü.
Myanmar aser Bangladesh na tsüngda tesentaktep mejungi lir aser talidak makaba Rohingya Muslim nungertemji par khuret ta linük anapronglai kati ka dang ashir.
Yaküm October 9 nü Rohingya telungpurtemi Myanmar border post tem amakdang police 9 tepset. Iba tatalokba asoshi Myanmar-i Muslim nunger timba sür aliba Rakhine State-i army yoka liasü.