Thailand anülolentip tsütsü tang ngua aliba tayimtsü raksaba osetji March 2014 nung Kuala Lumpur nungi Beijing-i aoba tayimtsü ka nung nisung 239 mener samaba, MH370 indang oset asütsü akok ta bilemer.
Kuala Lumpur, January 24 (Agencies): Malaysia-i tayimtsü raksaba oset ka atema Thailand den tongteprateptsü. Iba oset ya Thailand anüolentep tsütsü angu aser osetji Malaysian Airline MH370 indang asü masüar ano tejangja memetet, ta osangbenertemi Deobarnü metetdaktsü.
“Tang iba bushisüngdangba mapa kanga mazüngi inyaktepdar. Iba maparen asoshi civil aviation department-i Thailand den tongteprateptsü shiogo, ta Xinhu News Agencies ajanga metetdaktsü.
Iba tayimtsü tsükokba mapang asür kinüngertem temulung meraksadaktsütsü atema nüburtemi iba osang tejangja memetet tashi olulu meproktsüla, ta tayongzükba ka agütsüogo.
Thailand anülolen tip tsütsü aliba yimtaklirtemi tayimtsü raksaba oset mesükba merang ka, motong nung metre ana aser lenten nung metre asem ngua lir.
Iba tayimtsü raksa ya March 2014 küm samaba MH370, tayimtsü asütsü südi ta temulung malemer.
Malaysia nung State Agency tasenba, Bernama-i, Thailand ketdangsertemi iba oset asadangtsü asoshi mongintem anir arutsü, ta shiogo.
MH370 tayimtsü ya March 8, 2014 nü Kuala Lumpur nungi Beijing-i aoba mapang nisung 239 mener sama. Mena alir timba ka China nunger liasü.
2015 August ita nung Indian Ocean nung aliba La Reunion asetkong nung anguba tayimtsü tashikang mesükba osetji samar aliba tayimtsü meyong lir, ta Malaysia sorkari jangjatsüa liasü.
You must be logged in to post a comment Login