Malaysia nung Indonesia nunger asem pua ayu

Kuala Lumpur, July 10 (Agencies) : Malayasia anüdoklen tsütsü Sabah, Borneo asetkong tzüküm nung Abu Sayyaf telungpurtem tajemba agi Indonesia nunger asem pua lir, ta Deobarnü ketdangsertemi ashi.
Item Indonesia nunger ya Lahad Dalu yimti anasa rong nung oyaa pua bener ao, ta police ketdangsertemi ashiba Efe osang ajanga metetdaktsü.
Lahad Dalu yimti ya Sabah anüdoklentip nung anüdolen tsütsü lir aser iba yimti ya Abu Sayyaf telungpur kanga bulua aliba Philippines den kilometre 100 shi agidang pila lir.
Item telungpur yagi Islamic State telok kübok iba ama mapa tamajung inyaker aser iba ama inyakba nungi aaba sen ajanga parnok telok taküm alir.
June 20, 2016 nüa iba kasa telungpur telok yagi Indonesia nunger tenet tashi Sulu tzüyim nung rongnung oyaa lia apu.
Taküm April aser May ita tsüngda nung item telungpur yagi sen million 2 meshir Indonesia nunger angopur parnok nisung 14 chiokogo aser sen million 3 meshizüker Malaysia nunger pezü parnoki pua aliba chiok.
Taoba ita ana tsüngda nung Abu Sayyaf telungpuri atakteta yutsüba mapang shitak nung sen agi parnok ket metongtsüba ajanga Canada nunger, Robert Hall aser John Ridsdel na tekolak tangzüka südaktsü.
Parnoki taoba hopta tekolak atangertem Ridsdel aser Hall na den taoba hopta chioksang Filipina Marites Flor nunger den külemi pua ayuba Norway nunger Kjartan Sekkingstad-a tepseta intoktsü amokmerena liasü.
Abu Sayyaf telok ya tesüiba mapang Soviet Union den rarar Afghanistan nunger nisung tejen kari 1991 küm tentet aser iba sülen parnoki Philippines nung azü kanga tokshitsüogo.
Norway nungba denji külemi parnoki ano Japan nunger ka aser Netherlands nunger ka ta tang tashi mechioki yua lir.