Malaysia o Philippines na den senden amentsü: Widodo

Jakarta, April 26 (Agencies): Indonesia-i ayonger külen kidangsüa aliba Malaysia aser Philippines na den teloktep senden ka amentsü sentong renemba osang ka Indonesia Tir, Joko Widodo-i tanü, Mongolbar nü metetdaktsüogo.

Abu Sayyaf telungpurtemi Indonesia sensotem tzüyim nungi tashiyim agi pua lendong atalokdaktsüba sülen tzüyim nung lendongtsüdong atalokdaktsübaren nokdangtsü onüktem benoka jembitsü nükjidong nung tan teloktep sendenji ayonga amentsü renemer lir.

“Ozü linük asem nungi foreign minister aser mitkar lenirtemi senden mena, ozü linük asem indang tzüyim nung aroki lungjemer duty inyaktsü onük benoka jembitsü sentong renema lir,” ta Widodo-i osang jangjashitsü.

“Iba sendenji tan hoptasa amentsü sentong renema lir,” ta paisa ashi saka senden amentsü anogobo pai memetetdaktsü.

Abu Sayyaf telungpurtemi Philippines anülulentip tsütsülen tashiyim agi pua yua alir nisung 20 dak tema rong nung Indonesia sensoa nisung 14 tashi densemba osang bushiteta lir.

Parnok chioktsü melena sen meshiba takhangba olen ka Abu Sayyaf telungpurtemi metetdaktsüba osanga angazükogo.

Ajisüaka, telungpurtem nem sen agüja parnok kodanga metemoktsü lemtetba olen ka Widodo-ia metetdaktsüogo.

Abu Sayyaf telungpurtemi tashiyim agi pua ayur Canada nunger ka tekong tangja tepsetba sülen tekolokji yangko ka nung seper Philippines anülulentip tsütsülen Sulu province nung yashi, Hombar nü yüja aliba osanga angazükogo.

Akhangba ama, sen magütsüra, par teloki tashiyim agi yaküm September ita pua ayur Canada nunger 2 aser Norway nunger 1 rong nung nisung ka tekong tangja tepsettsü amokmerenba osang ka Abu Sayyaf telungpurtemi metetdakja liasü.