Malaysia sorkari ozüng tasen lateter

Kuala Lumpur, August 01 (Agencies): Tanü, Hombar nü nungi tenzüka, Malaysia linük nung linük kümzüktsü ozüng tasen lateta kasaji benshitsü tenzükogo.
Tan ozüng tasen lateta benshiba ajanga Malaysia Ato Kilonser, Najib Razak nem nüburtem temeten anema inyaktsüsa rongdak tashi agütsütsü ta tan ozüng tasen benokba anemertemi temulung malemba olen ka metetdaktsüogo.
Malaysia linüki lendong tsüdong ajurur ta bilemba shia, Najib-i nüburtem nem agütsüba temeten ajunga agientsüsa pa nem tashi agütsür lir.
“Temzüng ozüng aibelena benshiba anema menokdaktettsüsa Najib-i aniba Malaysia sorkari tan ozüng tasen benoker lir,” ta alima jenjang nung nübur temeten asoshi nokdaker tongti tentet, Amnesty International kübok South Asia & Pacific nung director, Josef Benedict-ia metetdaktsüogo.
Ano, Malaysia sorkari ozüng tasen benokba atema tebilemtsü akaba olen ka United Nations (UNS) kübok Human Rights regional office-ia tanü sangdong ka ajanga metetdaktsüogo.
Par tentetisa ashiba agi, tan ozüng tasen benokba sülen Malaysia nüburtemi par tebilemba lemsateptsü aser lokti senden jateptsü maparen aiben meinyaktettsüsa akümtsü.
Najib anema ochimashi inyakba ken o benoka benshiba mapang ka nung par linüki tan ozüng tasen ya benoker lir.
Malaysia sorkari ketdang asüba 1 Malaysia Development Berhad (1MDB) bank nungi dollar sen million 7 tashi Najib senpongi yokba osang bushitetba sülen pa anema ozüng alema sen agizüka agiba ken o benoka lir.
Ajisüaka, iba senji sorkar senpong nungi masü saka par election nüboyimtsü sentong nung amshitsü asoshi Middle East nung alir kati pa nem agütsüba teyari sen ta Najib-i pasasa metenja metetdakja lir.
Ano, Najib-i pa nem teyari sen agütsür nisung tenüng memetetdaktsüba ajanga pa anema benokba ken o mebentetti lir.
Ano külen, par Malaysia sorkar dak alaka, United States, Singapore aser Switzerland sorkartemia 1MDB den sentakba bushisüngdangtsüren tenzüka aliba osang bushiteta lir.