Malaysia tayimtsü lendong osang kinungertemi magizüker

Beijing, Luroi/August 03 (Agencies): Küm pezü tejakdang Malaysia Airlines Flight 370 lendong nung China nunger densema liasü. Rogonü/Friday International team kati taoba mapang atalokba lendong dak sendakba nung osang tasen ka sangdongba, aji kinungertemi magizük aser parnokisa iba bushisungdangba maparen tanaben tenzüktsü atema takhangba agütsü.
Züngsem 19 agi akümba International team-i renemba report ya chief investigator, Kok Soo Chon-i lemsatepa liasü. Iba osang anagdangtsü atema Beijing nungi asür kinunger noklangka shii aruagi aden.
Flight 370 anüng tom nung ayimba mapang tayimtsü anir den osang kecha magitetba sülen ghonda tenet tashi tangalen nungi tetuyuba agüja tayimtsüji yima liasü ta, kasa osang tanaben kinungertem dang lemsatepa liasü. Ajisüaka kinungertemi ashiba agi, lendong nung samartemji tayimtsü raksaba aser black box tem mengutet tashi osang tanga magizüktsü.
Kinunger karibo banner nung “never give up before seeing our next of kin” ta zülur ayimoktsü.
Metsüremi/March 8, 2014 nü Malaysia nung Kuala Lumpur nungi Beijing-i aotsü aliba tayimtsü nung passenger 227 nungi China nunger parnok ajak agi 152 shii liasü. Item passenger den densema tayimtsü nung parnok crew member züngsem 12 liasü.
Jiang Hui shiba tetsü tayimtsü nung mena liasü, lai ashiba agi, tang osangtem sangdongba yimyatem ngua kanga mepela.
“Malaysia ketdangser ajanga angazükba osang talisa lendong dak sendakba nung osang tejangjatem, maparen asadanga aser technical osettem amshia inyakba den külemi parnoki teinyaktsü tim inyak aruba yimyatem yagi meperitsür,” ta Jiang-i ashi.