Malaysia tzüküm nung angopur 15 kümzüka lir

Bangkok, February 21 (Agencies): Deobarnü angopur telok ka indang rong Langkawi, Malaysia nung meküpokba sülen Malaysian Maritime Enforcement Agency (MMEA) teloki iba rong nung aliba angopur parnok nisung 15 tashi kümzüka lir, ta MMEA sangdong ka ajanga metetdaktsü.
Angopur parnok 15 prongla ngua kümzükogo, ta MMEA sangdong ka ajanga ashiba Efe news agency-i metetdaktsü.
MMEA meyong rong ana aser Marine Police Force meyong rongtem den angopur rong aika iba rong meküpokba nung aliba angopurtem bushiba mapa nung yaritepa liasü.
Iba rong ya meküpokdang yangji aliba angopurtemi parnok lendong ajuruba osang agütsütettsü maongka anguba ajanga teyari kara ngutet.
Mopung aser tzüsem tesashi adokba ajanga iba rong ya Payar asetkong anüolentip tsütsü, tzü telungi kilometre 18.5 tashi ai.
Payar asetkong ya Langkawi litsü nung lir aser Malaysia anüolen aliba tzüküm nung marine park tajung aliba tesem ka lir, ta travel agencies temi ashi.

You must be logged in to post a comment Login