Malaysian Chef Tai Koon Slaung-i Sushi Chef naroküm angu

Tokyo, Rongjui (September) 14 (Agencies): Tokyo nung World Sushi Cup 2018 alidang Malaysia nungi Tai Koon Slaung nem World’s Best Sushi Chef naroküm agütsü.
Sushi ya Japan nung adokba chiyungtsü ka lir aser tanü alima nung iba chiyungtsü ya kanga nüngtugu kümogo aser nisung aikati sapua achir.
Tokyo ayongba tetoktepba nung Brazil, France, Malaysia aser Philippines nungi Sushi Chef temi shilem agi aser Tai Koon Slaung-i ‘Malaysia – Truly Asia’ ta ser sushi ka puratetba atema pa nem sempetji agütsü.
Ministry of Agriculture, Forestry, and Fisheries nung ketdangser Kazuhiro Shimane-i ashiba agi “Linük 9 nungi Sushi Chef metsü shi kati tetoktepba nung shilem agitsü.”
Tetoktepba nung sushi chef shia parnok indang omen shim aser minute 40 tsüngda sushi yanglua agütsü. Iba sülen tetendangertemi sushi tendanga liasü.
Japanese dish renemdang chef temi tereprangtsü ajungba dang masü saka tzü nung anguba chiyungtsü rangsaba aser renemba nung temulung kanga agütsü.
“Sushi aika American style nung renema liasü saka kümshia sushi ya Japan nunger sobaliba ‘Edomae sushi’ mesüka kümdar” ta Masashi Kasado-i ashi.
Sushi ya “Washoku” (Japanese nunger sobaliba chiyungtsü) nung shilem ka lir aser UNESCO Intangible Cultural Heritage of Humanity ta züngoka lir.
Sushi ya küm noklang ana tejaklen Japan nung renema achitsü tenzük. Iba mapang refrigerator mesüra ice maliasü aser iba jagi chiyungtsü tazü jungjunga renem aser Sushi ya sobaliba chiyungtsü rongnung ka ta benshiyonga arur.