Malaysia:Tayimtsü anendak tepseta südaktsüsangji Kim Jong-nam lir

Kuala Lumpur, March 10 (Agencies) : Taoba ita Kuala Lumpur International Airport nung North Korea nunger ka tepseta südaktsüsangji North Korea lenir Kim Jong Un tedi, Kim Jong-nam lir, ta Hokolbarnü Malaysia-i osang tejangja metetdaktsüba police temi ashi.
Inspector-General of Police Khalid Abu Bakar-i, Kim Jong-nam jangjatsü asoshi teinyaktsü tim ajunga inyakogo, ta metetdaktsü.
“Pa koma sür jangja iba osang onoki rasaa mashitsü,” ta pai linük yimtiba Kuala Lumpur nung osangbenertem dang ashi.
Police-i official süa tasüsangji Kim Jong-nam lir ta jangjabaji tan mezüng lir.
Bakar-i, tasümang ya tang Malaysian Health Ministry ket nung agütsütsü kechiba süra Kim tasümang amanglemi shinga marur, ta ashiba osangkaket ajanga metetdaktsü.
February 13, 2017 nü Kuala Lumpur International Airport nung Macau-i aotsü asoshi tayimtsü ata aliba mapang Kim dak chemical, VX nerve agent shiloktsü, ta Malaysia police temi ashi.
Iba dak sendakba nung Asia tsür ana, ka Indonesia aser tanabulaji Vietnam tsür, ta pua lir aser tena dak tai putet nungbo tasüba agi merenshitsü.
Kim tepsetba dak sendakba nung Malaysia police temi dang North Korea nunger nisung tenet bushidar. Parnok rongnung nisung pezübo par linük nung atsükoka lir amai temulung melemi bilemer.
Iba atalokba sülen nungi Malaysia aser North Korea na tesendaktep tera mokonga kümogo.