Maldives-i taoba Tir, Nasheed tepuokdak nungi chioktsüla : Hussein

Geneva, August 25 (Agencies): Maldives-i par taoba Tir, Mohamed Nasheed tepuokdak nungi chioktsü tajungshiba olen ka United Nations (UN) High Commissioner for Human Rights, Zeid Ra’ad Al-Hussein-i tanü Mongolbar nü metetdaktsüogo.

Maldives-i democracy yimsüsütsü yimya benshia shimtetba mezüngbuba Tir, Nasheed-i o bendanger ka aputsü ozüng agütsüba sülen Nasheed ya yimsüsütsü menden nungi 2012 küm anentsü.

Nasheed yimsüsütsü menden nungi anentsüba den külemi, pa nem tepuokdak küm 13 tashi puoka ayutsü temerenshi agütsü saka tesülen pa house arrest nung lidaktsütsü asoshi pa nem agütsüba temerenshiji melenshitsü.

Ajisüaka, Nasheed ya taoba Deobar aonung Maafushi Island nung tentetba tepuokdak kati anir oa idakji puoka ayuba osang jangjaogo,” ta UN Human Rights telok otongdar, Rupert Colville-i osang jangjashitsü.

“Maldives-i par taoba Tir, Nasheed tanaben tepuodak puoka merenshitsü tenzükba atema ozü lenisang, Hussein-i tebilemtsü khuret benoka, Nasheed tekaraba mapang nung tepuokdak nungi chioktsü tajungshiba olen ka metetdaktsüogo,” ta Colville-i ashi.

Nasheed tepuokdak nungi chioktsü ajungshiba den külemi, Maldives nung taküm May ita ayongba longkak aittsü sentong nung shilem agirtem anema benokba ozüng alema inyakba ken o tanaben benokshia kasaji okadak angadanga aibelener nem tapet temerenshi agütsütsü asoshi Hussein-i metetdaktsüogo.