Maldives tatong Tir Ahmed-i Tir tepsettsü asameyangba atema apu

Male (Maldives), October 24 (Agencies): Maldives linük tatong Tir, Ahmed Adeeb-i Tir, Abdulla Yameen tepsettsü merangba atema tanü Honibar nü Maldives ketdangsertemi pa puogo; Taoba ita rong ka nung bomb apokba lendong nungi Tir tera agi jenbua liasü, ta Home Minister-i ashi.
“Tatong Tir Adheeb puogo aser Dhoonidhoo Detention (Asetkong tepoukdak) nung yua lir,” ta Home minister Umar Naseer-i twitter ajanga ashi.
“Tai tongloktsübaji: linük anema inyakba.” ta Home minister-isa ashi.
Tanü par mapang 7:00 ako meta arishi küm 33 Adeeb Singapore nungi meyipa aruba mapang Maldives nung aliba International airport tongti nung apu.
Maldivis police-i ashiba agi, Sept. 28 nü Yameen indang rong apokba kuli bushisüngdangba dak sentakba nung pa puogo.
“Tir indang rong apokba bushisüngdangba dak sentakba nung court tetuyuba kübok tatong Tir Ahmed Adeeb puogo,” ta Maldives police-i twitter aser official website ka ajanga ashi.
Linük anema inyakba atema Deputy, Mohamed Jameel menden nungi atsüngdaktsüba sülen ita asem tejaklen Yameen-i pa Deputy atema Adeeb shima liasü.
Tir Yameen Saudi Arabia-i temeshi aini aoba sülen meyiba arur yimtiba Male nung rong nungi ayazüka aluba mapang rongji apok. Iba lendong nung pabo meyiru saka pa kinüngtsü den tangar ana tera yirua liasü.