Maldives tatong Tir ya linük atema lendong: Yameen

Male, October 25 (Agencies): Maldives tatong Tir, Ahmed Adeeb-i Tir, Abdulla Yameen tepsettsü merangba atema yashi linük ketdangsertemi pa apuba sülen anogo ka lir tanü Maldives Tir, Abdulla Yameen-i, pa indang Deputy (tatong Tir) ya linük atema lendong lir, ta ashi.
“Lendong mataloktsü aser linük security atema tatong Tir pua lir,” ta Yameen-i linük TV sentong nung jembidang ashi.
Yameen-i ashiba agi, Adeeb den yaritepa inyakertem ki yashi mita reprangba mapang bomb yangluba osettem nguogo.
“Adeeb den atongsema inyakertem ki mita reprangba mapang police-i bomb yangluba osettem nguogo. Tatong Tir nem tai aika tonglokja lir,” ta Tir Yameen-i ashi.
Maneni bushisüngdangtsü atema court-i Adeeb anogo 15 nü pua ayutsü tetuyuba agütsüogo.
Maldivis police-i ashiba agi, pa pua ayubaji Sept. 28 nü Yameen indang rong nung bomb apokba kuli bushisüngdangba den sentaka lir.
Tir Saudi Arabia-i temeshi aini aoba sülen meyiba arur Capital Island, Male nung rong nungi ayazüka aluba mapang rongji apok. Iba lendong nung pabo meyiru saka pa kinüngtsü den tangar ana tera yirua liasü.
Yameen-isa, Adeeb-i kuli samatsütsü meranger aser bomb apokba bushisüngdangba nung pai tetsükdaktsü bener arutsür, ta aitsüogo.