Mali hotel amakdang 13 asü, UN züngsem 4 kümzüka lir

Bamako, August 8 (Agencies): Mali, Sevare nung Islam kiralongrar ta temulung malemba nisungtemi, UN ketdangsertem teti anenzükba hotel ka amakdang tajemba agi nisung 13 süogo, ta Honibar nü ketdangsertemi metetdaktsü. Mali Army temi ashiba agi, South Africa nunger ana, item telok yagi Ukrain nunger ka aser Russia nunger ka, ta par pezü, Hokolbar nü Byblos Hotel nung pua ayu saka tangbo chiokogo, ta BBC osang ajanga metetdaktsüogo. Hokolbar nü anepdang nungi memetetba prangpong amer nisungtemji motorbike nung mener Sevare lunga lendong agüja jaja liasü aser parnoki hotel mamak tsüngda air force tesem ka tama amak. Mali (Minusma) nung UN peacekeeping force ajanga ashiba agi, international force züngsema ka dena iba lendong nung taküm samar alitsü ta tamang makai bilemer. Ajisüaka parnoki iba züngsem indang osang tejangja ano kecha memetetdaktsü. Iba tesem nung alir kati BBC dang Hokolbar nü ashiba agi, jila nung iba ama lendong atalokba ya tan mezüng lir. Pai, “Mali nung lendong ataloker saka tan Sevare nung ataloba ama lendong tulubo kodanga matalokdang,” ta ashi.