Mali nung UN peacekeeper tem pokset

Bamako, October 27 (Agencies): Northern Mali nung United Nations peacekeeping mission züngsemtem indang gari agi mine mesüra improvised explosive device (IED) nung menünga apokba lendong nung UN peacekeeper asem taküm sama aser ana yiru, ta ketdangser osang ajanga ashi.
Iba lendong ya Brehostibarnü 14:30 GMT ako meta Tessalit aser Aguelhok tsüngta ‘logistical convoy’ meina aoba mapang adalok.
Iba lendong nung yirur peacekeeper ana ya Kidal jila-i temang anepalutsü asoshi anir aruogo, ta United Nations mission in Mali (MINUSMA) ajanga sangdong ka nung ashi, saka parnoki lendong ajangshirtem indang linük memetetdaktsü.
“Iba ama mapa tamajung inyaker ya kanga khukhua aitsür, shirnok nükjidong ajunga agi linük raksatsütsü aser Mali nung yimjung atema maparen inyakba nung timtem agütsütsüba dang lir,” ta MINUSMA nung interim chief, Koen Davidese-i ashi.
Linük nung yimjung bener arutsü asoshi akokba tashi nung inyaktsü UN mission-i renema lir, ta pai-sa shiem.
Iba amala lendong tesashi ya international war crime ama züngshitsüla, ta Davidse-isa ashi.
Iba lendong ajurua alirtem, parnok kibong aser külemi inyaker den onok temolung dena lir, ta UN peacekeeping nung undersecretary-general Jean-Pierre Lacroix-i social media nung metetdaktsü.
Tang tashi iba lendong agütsüba tenüng telok katia agia mali.
Saka mapang ka al-Qaeda den sendaktepa aliba Jamaat Nusrat al-Islam wal-Muslimeen teloki iba tesem nung lendong agüja aru.
Kidal south nung aliba Gao region nunga Bangladesh nungi oa aliba peacekeeper indang convoy dak September ita amak aser iba lendong nung parnok züngsem aser tepset aser pongu kanga mejungi yirutsü.
2013 nungi MINUSMA ya Mali nung yoka lir aser iba linük nung peacekeeper züngsem 80 dak tali tepseta alima nung mission tamajungtiba kümogo.
Mali indang kidanger Niger, Chad, Mauritania aser Burkina Faso linüktema Sahel region nung telungpurtem den rara arudagi.