Mali training nung nisung asüba ajanga Dutch minister mapa nungi anen

Amsterdam, October 04 (Agencies): 2016 küm artillery training agiba mapang lendong adoka UN peacekeeping troops nungi nisung ana taküm sama aser ka yiruba ken o nung ajemdaker Netherlands defence minister aser mitkar tekolakba Mongulbar aonung mapa nungi anen.
March ita election agiba sülen Jeanine Hennis-Plasschaert ya minister inyaka liasü aser Dutch Safety Board ajanga Mali nung lendong atalokba indang osang taoba hopta sangdongba sülen la atema khuret tuluba aküm.
African linük tem dangi ‘peacekeeping mission’ yokba mitkartem ya defence ministry ajanga anepalu asür asünungji parliament nung iba osang dak ajemdaker mangatettep adokba sülen lai iba menden toktsüba osang metetdaktsü.
“Defence ministry tenzüktsü asoshi kü indang tanüla aser molungsentsü ajunga agütsü. Saka ibaji tanü yangi tembanger,” ta lai linük yimden yimsüsür dang ashi.
Defence nung tekolakba General Tom Middendorp-a mapa nungi anener, ta küm pongu tashi minister inyakla, Hennis-Plasschaert-i lokti dang ashi. General Tom Middendorp-i iba menden ya taruba hopta toktsütsü liasü, saka iba menden toktsüba indang tatembang sentong ka yakta agitsü südi.
Kidal nung Dutch mitkartem aliba anasa training agiba mapang ‘mortar shell’ ya nükjidong medongteti apok aser iba mapang mitkar ana pokset aser ka yiru, ta iba lendong bushisüngdangba osang nung shia lir.
Item mortar shell ya American mitkartemi amshia alitsü aser parnoki tendanger alia amshi südi, ta bilemer ministry ajanga 2006 küm tetendangba kicha magie alizükba ajanga nüburtemi aitsü.
Saka item raradang amshiba nok-o-nü aliba mapang iba amala zülutepa mali aser item oset indang kuli kicha US ketdangsertemi agüja mali.