Mallika Sherawat dak nisung kari züker auya

Paris, November 17, 2016 : Memetetba nisung asem tejak nembanger arua India tsür actress Mallika Sherawat dak la indang Paris nung aliba kidang tenük azütsü tango inoktsür azükba sülen auyar ao, ta osang kar ajanga Paris nung metetdaktsü.
Iba dak sendakba nung bushisüngdang ka tenzükogo.
November 11, 2016 nü atalokba osang ya police-i Brihostibarnü temai adoka metetdaktsü. Ita ka tejakdang TV star Kim Kardashian daka prangpong agi tuita lia auyar ao, ta dailymail.co.uk osang ajanga metetdaktsü.
Arishi küm 40 tain, actress, Mallika aser tetong, France nunger businessman Cyrille Auxenfans na dak tenük azütsü tango inoktsü aser tatsünga atsüng. Tena France yimtiba 16buba arrondissement mapang la indang apartment-i arudang iba lendong ya atalok.
Le Parisien osangkaket ajanga ashiba agi, lar kidangi aruba auertem tejakji sü agi meyibanger liasü aser parnoki ojang ka tanga mejembii tena dak tenük azütsü tango kahloktsüba sülen tatsünga tsüngoktsü.
Parnok jena aoba sülen tenati taoksakang nung emergency service aja.
Iba mapa ya auyatsü atema inyak asütsü südi ta temulung melemi bilema detective temi bushisüngdang maparen tenzükogo.
Mallika-i tweet asüba kodang reprangdangdir la tang ya Geneva nung oa lir. Lai Geneva ji lai kangasa meimba tesem ka lir, ta ashi.
Mallika-i Bollywood film tem kanga temulung ulua shilem agiba ajanga ajaki la meteta aküm. Iba den külemi lai Jackie Chan den “The Myth” film nung shilem agiba sülen tali nüngtugu aküm.