Mallya India nem magütsütettsü: UK

New Delhi, May 11 (Agencies): India atema osang tamajung kaji, Bodhbarnü United Kingdom (UK)-i India sorkar dang, parnok ozüngtem kübok Vijay Mallya India ket nung magütsütettsü ta metetdaktsüogo.
Ministry of External Affairs (MEA)-i sangdong ka ajanga ashiba agi, “UK sorkari asenoki dang, 1971 Immigration Act kübok, passport temsüa (valid) dang lira UK-i nisung ka ket nung valid passport bena alitsü menüngdaker, parnok passport temsüa (valid) lira UK nungi kodang aotsü, alitsü mesüra arutsü item temetenji agüja lir, ta metetdaktsüogo.”
“Iba den külemi (Mallya nem) tai tonglokja alibaji UK-i süoki ia agir aser India sorkar den yariteptsü molunga lir ta shiogo. Parnoki India sorkar dang külem tangatettep nung temzüng inyakyim nung yariteptsü mesüra nisung meshitsü atema mepishiang ta shiogo,” ta MEA otongdar, Vikas Swarup-i ashi.
India-i UK sorkar dang Vijay Mallya India ket nung agütsütsü mepishiba sülen hopta ana lir tanü UK sorkari Mallya ji India ket nung magütsütettsü, ta jangjajangja shiogo.
India nung bank balala dang sen crore 9,400 apoba sentsüh magütsütetba atema Mallya anema ken o benoka lir. Taküm March 2 nü Vijay Mallya-i India toktsür London-i oa liasü.
Iba ken o bushisüngdangba nung yariteptsü atema ketdangsertem aser Enforcement Directorate (ED)-i Mallya asemben tashi parnok matsüngdangi arutsü jaoka liasü, ajisüaka pai maruba ajanga sorkari pa indang passport meyipa agi.