MALT-i Mct-Milak lenmang anasa süngdong kar atemba den ayong merüka amung

Mopungchuket, Sep 4 (TYO): Mopungchuket Ait Laishir Telungjem (MALT)-i achaayanga inyakba ‘The Greensight Project’ nung aliba ama Mopungchuket-Milak lenmang anasa süngdong tajung kar atemba den ayong merükba maparen kar inyaka liasü, ta MALT osang ka ajanga metetdaktsü.
Iba maparen ya Sep 1 nungi 3 tashi inyaka liasü. Iba mapatong ya yim tobur jungdaktsütsü nükjidong nung küm pungu (5-year) atema lir aser ibai atsülangtsü akok. Iba mapatong ya taküm July ita nungto tenzük aser 2021 küm tembangtsü, ta parnokisa ashi.
Tanü Greensight Project’ volunteers-temi Mopungchuket-Milak ayong lenmang kms 4 shi nung süngdongtem tema liasü. Mopungchuket nungi Milak ayong tashi ya kms 11 shi lir aser tanüngba wadangji taruba süngdong atemba mongpu nung atemtsü ta, parnokisa shisem.
Volunteer-temisa Wazük ayong nung merükmejuba mapatem inyaka liasü. Oliorar aser yataontar (picnickers)-temi ayong menena yutsüba janaonatem bendena itemji merükteta amung. Iba project dak sentakba nung MALT-isa Mopungchuket lushi nung aliba ayongtem ajak merüktettsü, ta parnokisa inyaktsüba sentong kar lemsatep.
Alima tzü-mopung atema inyaker telok mesüra school/college balala nungi eco-club-temi ayong merükba (river clean up exercises) nung shilem agitsü asoshi MALT-isa ayongzüka metetdaktsü.
Mopungchuket lushi kübok ayongtem nung angoh apodang mim mozü mesüra lendong aketba osettsüset kecha mamshitsü asoshi yim putu mendeni ozüng sashisashia yanglua lir, iba nungji shirnoki aibelendir meyirijang tenem (50,000/-) senchi lir, ta kümdanga alitsü asoshi kasa osang nungsa metetdaktsü.