MALT-i RD Director dang BDO merenshitsü akanger

Dimapur, July 05 (TYO) : Mangkolemba nung 2013 küm September ita nungi tanü tashi BDO-i anir pa office nung mapa inyaker shinga marur, iba jagi nübortem kanga akoksadagi ta tanü Mongolbar nü Mangkolemba Ao Lanur Telongjem (MALT)-i Rural Development Director dangi züluba shidi ka nung metetdaktsüogo.
Mangkolemba Sub-division ya Nagaland nungbo sub-division tulutiba asütsü, iba yagi Jangpetkong, Japukong aser Tsurangkong  kübok yimtsüng 56 repranger, anungji Mangkolemba BDO aser pa den inyakertemi inyaktsü mapa tulu lir ta lanurtemisa metetdaktsü.
2013 küm nungi MALT teloki BDO office aiben semdangogo aser iba osangji   Addl. Deputy Commissioner-tem nemsa agütsüogo. Ano, taküm 2016 küm a March 30 nü aser June 10 nü  semdangogo saka  taoba mapang amaisa office nung inyaker shinga mali asü. Iba osangji June 13, 2016 nü osangkakettem ajanga metetdaktsüogo, saka tang tashi department-i aibelenertem dak inyakba kecha mangur ta MALT-isa mepelai metetdaktsü.
RD nung Director-i iba ama mapai maoba aser tashi mangaba inyakertem dang kecha meshii toktsübaji shisabolutsüka lir ta Mangkolemba lanurtemisa metetdaktsü.
Anungji, July 31, 2016 tashi nung RD Director-i Mangkolemba BDO aser pa den inyakertem nem tapet temerenshi agütsütsüla aser BDO tasen ka yoktsüla, aji mesüra onoki ochimashi mapatem anema nokdaktsü ta MALT telokisa takangba ka RD Director nem agütsüogo.