MALT-i SDEO Office, Mangkolemba mita ao

Mangkolemba, 04 July (TYO):  Mangkolemba SDEO Office nung Head Assistant (HA), Thsipong May 23, 2016 nü District Education Office, Kiphire office nungi mapa benzüka yok saka pa office-i maruba atema education department aser state sorkari kecha meinyakba atema July 04, 2016 nü Mangkolemba Ao Youth Organization (MALT)-i Mangkolemba nung Sub Divisional Education Officer indang office nung lungkak ait, ta MALT Tir, Imjong Longkumer aser Asst. Gen. Secretary, Tinuniken Langu nati sangdong ka ajanga metetdaktsü.
Lungkak aitba nung shilem agitsü atema MALT züngsem 130 shi adenshia liasü.
“MALT-i SDEO office anema mapang telatet makai lungkak aittsü liasü, ajisüaka Addl. Deputy Commissioner, Mangkolemba, Imtiwapang Aier-i, Directorate of School Education, Nagaland tenüng nung HA,Thsipong ozüng tapet agi merenshitsü aser SDEO Mangkolemba dangi HA ka yoktsü ta ashiba ajanga iba lungkak aitba thinen,” ta kasa sangdong nung shia lir.
MALT-isa Addl. Deputy Commissioner, Mangkolemba ajanga Chief Secretary, Nagaland dang tashi mangaba HA nem temerenshi agüjang aser July 18, 2016 tashi nung SDEO office Mangkolemba atema HA tasen ka agüjang ta takhangba agütsüogo. Item takhangba mataloktsüra MALT-i nüngdakba mera agitsü, ta mendenpurtemisa metetdaktsü.