MALT-i yimtsüng terenlok mapa inyaker

Mopungchuket, Aenjeti 23: Mopungchuket Ait Laishir Telongjem (MALT)-i achayangba Greensight Project züngsemtemi süngdong atemtsü asoshi terenlok mapa inyakba tesem nung tangokba noksa nung angur.

Mopungchuket| 23 Aenjeti (TYO): Mopungchuket Ait Laishir Telongjem (MALT)-i achayangba Greensight Project puri “Growing Dreams” omen dak rangloker Mopungchuket lima tebur junga ayutsü nükla nung ‘tree-lined avenue’ ta sür mapatong ka inyak tenzükogo. Iba mapa inyakbaji Mopungchuket yimdak Yajen Aier Government High School lenmang anasa meter 200 shi asütsü.
Lenmang anasa süngdong balala atemtsü atema lenmang tera ulushidar. Iba mapa nungji Greensight Project züngsemtem den yaritepa Mopungchuket putu yimsüsürtemia reprangshima inyakdaki.
Mopungchuket putu pur aser ali kiburtemi maparen ajak nung amalitepa nungita yaritepba den parnok tayimjem/tesadem shisatsü tajung ngua MALT-Greensight Project züngsemtemi pelaba metetdaktsü.
MALT Greensight Project ya 2016 küm July 26 nü, tang teinyakdak NLA Speaker Dr. Imtiwapang Aier-i tenzüka yutsü. Greensight Project ya küm pungu atema tenzükba mapatong ka lir aser ibai ajung nungbo atsülanga aotsüba mapa ka lir. Iba mapatong ya tenzüker Greensight Project puri alima tebur ajungtsü aser tzü mopung wazüka ayuba nung hau ta asütsüsa maparen aika inyaka arudar aser itemji timbaka temulungertemi tenlaba nungi lir, ta angazüker.
Lenmang ulushiba mapaji anogo ananü tashi nung temadoktsü. Iba sülenji süngdong balala atemtsü asoshi ongken (pit hole) tua ayutsü, parnok sentong lir.