Mamangertem den Christmas

Asenok meketa mamangertem yutsür asenok kija chiyongtsü tajungtiba awazüa chiyongtepa Christmas amongtsüba ya tera matong aser mabensa amai bilemer. Yisu Khrista alima nung alidang pai temenen purtem den Tsüngrem temeim kuli asütsü asoshi inyakba sentong kaji chiyongtsü renemdaktsür külemi chiyongba yimya ya liasü. Asenok sobaliba nunga temeim ya külemi chiyong dang chisemer ta jembir Tetezü külemi chiyongba ajanga nisungtem rongnung temeimtepba aser teputepba akümer. Iba kasa inyakyimji tanü asenok Khristan purtemi ajizüka inyak nung junger ta bilemer. Khristan ka mapaji Tsüngrem temeim indang mamangba purtem dang kuli asütsübaji lir. Aji oda, mamangba purtem den süngo marok ka lemsatepa ajemdang mesüra chi auso ka lemsatepa chiyongdang Tsüngrem temeim indang kuli asütsübaji petpeter asütsü. Atangji, mashi mapang ka nung asenoki mamangba purtem den külemi chiyongtsübaji mapang agi mesüteptsü. Ajisüaka, benjong tenüng atemer asenoki parnok den külemi chiyongtsü sentong yanglura, parnokang tepelaba asütsü. Tajung aser taochi kaji Christmas benjong yabo alima ajak nung ajaki amonger, anungji asenoki ajak nung ajak den pelatepa mongtettsü. Atangji, asen lima nung yimtak yimtsüng nungbo mamangertembo malitsüa akok, ajisüaka town nung alirtembo mamangba purtem den külemi alir. Mamamgba purtem den külemi alir asünungji parnok benjongbentsü nung jaokdanga asenok oagi külemkija mesüaka parnok den külemi chiajema pelateper. Aji oda, asenok den külemi alir Hindu mesüra Muslim nunger kibong kati par benjong nung asenok chiyongi jaokra, ibajia asenok asoshi parnok den pelateptsü mapang tajung ka asütsü. Asenok Christmas amongba yimya ya arogo kar nung sentep asem pezü agir aser Christmas anogo nung chiyongtepa amonger, saka ano arogo kar nungbo sentep sentong dang agir senshir. Ano, kibong karbo pei ki toktsür oa bendanglen amonger. Iba amaji asenok kija, kibong aser arogo shia Christmas benjong amongtsü asoshi sentong balala renema lir. Kong mongdir mongaka asenok Christmas amongbaji Tsüngrem chir Yisu Khrista asenok menen alangzüktsü asoshi alimai aruba anogo bilemteta amonger. Iba tangatetba nung kodang asenoki Christmas mongdir, Christmas amongbaji Tsüngrem temeim bilemtetba aser Tsüngrem temeim lemsatepba benjong asütsü. Ibaji jangratemtsüka lir. Atangji, alima nung benjong amongba ajak ya pei kinunger aser medemertem den pelatepa amongba benjong lir saka Tsüngrem temeim bilemteta amongba benjongbo Christmas ya dang asütsü. Iba Christmas anogo ajanga asenok nem inyakdaktsünüba mapa tongtibang ana lir. Ibaji ka, Tsüngremi kechi koma asenok meim yamaji asenok rongnung meimteptsü aser ano teinyaktsü kaji, iba kasa temeimji tangar dang kuli asütsü. Atangji, asen lima nung yimtak yimtsüngtem nungbo mamangba purtembo malitsü südi saka town nungbo asenok aika mamangba purtem den kiyong ka nung  külemi alir. Ajisüaka, asenoki parnok dang Tsüngrem temeim kuli mesütetter.Ibaji asenok asoshi Tsüngrem tsüngdang tamakok tulutiba asütsü. Asen den külemi alirtem dang”Yisui kümzüker” ta  ashitsübaji asenok amangba purtem mapa lir. Iba mapaji inyaktsü atema Christmas mapang ya parnok den külemi chiyongtsüsa asenoki sentong renemtetra, kanga ajungtstsü . Aji oda, December 25 nü mamangba purtem den külemi asenok sentep senshir chiyongtsü atema kiyong shia nung parnok mamangba purtem nem asenoki sen agütsür shishidaktsütsür parnok nemsa soruchiokdaktsütsü. Iba jagi asenok sen ishinba endoktsü aser chiyongtsüa tajungba soruchioktettsü aser mamangba purtema parnoki soruchiokba chiyonger asünungji jangratema chiyongtsü. Chiyonger külen parnok oshi agi sayutsüngitetba sayutsüngir tajung nem Yisu temeim indang shidaktsür parnok atema sarasademtsütsü. Asenokibo Yisu temeim indang dang ashitsü  aser tanüngbajibo Tsüngremi parnok mulungjang nung inyaktsü. Iba amaji asenoki mamangba purtem den Tsüngrem temeim kuli süa Christmas chiyong chiyonga among nunga kanga temoatsü süla ta bilemer.