Mamata, Akhilesh, Nabi Azad nungeri Lalu-i ayongba senden nung adentsü

Patna (Bihar), August 26 (Agencies): RJD tongti, Lalu Prasad-i BJP anema Deobarnü Patna nung ayongba “BJP Bhagao, Desh Bachao” rally nung tanga party tem nungi lenirtem densema nisung meyirjang aika adentsü, ta osang angazüker.
Tanü Lalu Prasad-i, iba senden nung Janata Dal-United lenir Sharad Yadav, Trinamool Congress tongti aser West Bengal Chief Minister, Mamata Banerjee, taoba mapang Uttar Pradesh Chief Minister aser Samajwadi Party tongti, Akhilesh Yadav aser Congress lenir, Ghulam Nabi Azad nunger adentsü, ta metetdaktsü.
Parnok dak alia Congress lenir, C.P. Joshi, NCP nungi Tarique Anwar, RLD nungi Choudhary Jayant Singh, CPI nungi Sudhakar Reddy, taoba Jharkhand Chief Minister aser JMM lenir, Hemant Soren, JVM nungi Babulal Marandi, AIUDF tongti, Baadruddin Azmal aser DMK, JD-S, RSP nungi lenirtema iba senden nung adentsü, ta Lalu-isa metetdaktsü.
Ajisüaka Bahujan Samaj Party (BSP) tongti, Mayawati bo iba senden nung madentsü aser Congress tatong Tir, Rahul Gandhi-a aieni aor, anungji senden nung medentettsü.
Tanep Lalu-i, “Party lenirtem, party nung inyakertem aser onok pusemer nisung meyirjang aika Patna-i aru tenzükogo,” ta metetdaktsü.
Lalu Prasad’er jabaso aser taoba deputy Chief Minister, Tejashwi Yadav-i, “Nitish Kumar-i yazü jembia maongka agia BJP den loktepba indang onoki jungkai aoktsütsü,” ta metetdaktsü.
Ano RJD otongdar, Shakti Yadav-ia, “Iba rally ya ajanga Bihar nung lokti lenirji Lalu dang lir ta kuli sayutsü. BJP anema nokdaktsü aser anema inyaktettsü lenirji pa dang lir,” ta metetdaktsü.