Mamata Banerjee den tokteptsü atema Chandra Kumar Bose shim

Delhi, March 9 (Agencies): West Bengal nung taruba Assembly elections nung West Bengal Chief minister, Mamata Banerjee den tokteptsü atema BJP-i Chandra Kumar Bose shimba osang metetdaktsü.
Chandra Kumar Bose ya Netaji Subhas Chandra Bose’er kinünger lir aser Bodhbar nikongdang BJP lennir aser Union HRD Minister, Smriti Irani-i iba osang metetdaktsü.
“Chandra Kumar Bose ya Netaji Subhas Chandra Bose’er kinunger aser Sharat Chandra Bose’er semchir lir. Taruba West Bengal assembly election pa Bharatiya Janata Party candidate ka ama Mamata Banerjee den tokteptsü aser iba osang ya National president Amit Shah nungi temelaba ngua ni sangoktsür,” ta Irani-i New Delhi nung osangbenertem dang ashi.
Ano külen, Chandra Kumar-ia, “West Bengal nung temelenshi ka bener arutsü mapang tongogo aser ibaji BJP-i bener arutsü,” ta metetdaktsü.
Chandra Kumar ya taküm January ita BJP nung aden.
Tanü, Malda nung election nüboyimba sentong ka nung jembidang Mamata-i Congress o CPM na teti yaritepa arur aser tang ibaji jungkai adokogo, ta metetdaktsü.
“Tenembangtsü agienogo. CPM aser Congress tangatetba mali aser teinyaktsü asalendong kecha mali. CPM aser Congress-i onoki BJP den yariteper ta aija aru saka parnok tamendakdak kecha mali, kechiyong parnoki BJP ang yarir,” ta TMC lennirisa aitsü.
“Congress, CPM aser BJP party tem tesentaktep tamajung ka kümtetogo. BJP-i Hindu nunger vote atema aser Congress-i Muslim nunger vote atema nüboyimtep aser tatem nung nübortem ang akoksa,” ta Mamata-isa shisem.
Züngsem 294 agi akümba West Bengal Assembly atema elections April 4 nungi May 5 tashi shilem trok lemsar agitsü. Iba elections atema vote ji May 19 nü azüngtsü.