Mamata-i Amit Shah ajurua Assam NRC atema jembi

New Delhi, Sept. 19, 2019: Brihostibarnü North Block, New Delhi nung West Bengal Chief Minister, Mamata Banerjee-i Union Home Minister, Amit Shah ajurudang tangokba noksa nung angur.

New Delhi, Rongjui/September 19 (Agencies): Brihostibarnü New Delhi nung West Bengal Chief Minister, Mamata Banerjee-i Union Home Minister, Amit Shah ajurua Bengali aser Hindi jembir senso aika National Register of Citizens (NRC) nung züngdokba atema süoka jembiogo.
Trinamool Congress (TMC) tongti, Mamata-isa, parnok temeden angadangtsü atema parnok nem maongka agütsütsüla, ta metetdaktsü.
Shah den minute 30 shi senden amenba sülen osangbenertem den jembidang lai, “Assam nung NRC nung züngdokba nisung lakh 19 rongnung Hindi oshi jembir sensotem aser Gorkha nunger densema Bengali oshi jembir aika züngdokogo. Ajungbena parnok taküm tia memeteti kümogo. Ni iba tebilemtsüji home minister den lemsatepogo. Ni pa dang, chichiba India sensotemi timtem majurutsüla ta shiogo,” ta metetdaktsü.
Lai ashiba agi, iba senden nung West Bengal nung NRC mapatong atemabo mejembi.
“Assam nung NRC ya menüngdak, ibaji ozü sorkar tangatetba. Nitish Kumar (Assam Chief Minister)-ia NRC ya Bihar nunga menüngdak ta jembiogo,” ta lai ashi.
Taküm Lok Sabha election sülen Amit Shah Home Minister akümba sülen tang mezüng Mamata-i pa ajuru.
Banerjee-isa, lai Shah den Bangladesh, Myanmar aser Bhutan den Bengal arrtsü dak sendakba tebilemtsü onüktema lemsatepogo, ta metetdaktsü.
Chief minister-i ashiba agi, lai Shah den senden amenbaji linük temzüng dak sendakba teinyaktsü mapa ka liasü.
“State Chief minister ka ama bendang linüktem -Bangladesh, Bhutan aser Nepal den arrtsü dak sendakba atema inyaktsüji kü mapa,” ta lai ashi.
Bodhbarnüa Mamata-i Ato kilonser, Narendra Modi ajurua senden mena liasü, ajisüaka lai ashiba agi iba senden nung yimtenren onük kecha mejembi.
Mamata-i ashiba agi, iba senden nung lai Ato kilonser dang West Bengal nüngja agi Bangla melentsü benok aser Birbhum nung coal field project semzüktsütsü atema pa dang mepishia liasü.