Mamata-i longkak aitba sentong nung JD-U, SP aser NCP aden

New Delhi, November 23, 2016: Ato kilonser, Narendra Modi-i aniba Centre sorkari sen tamshidak notes anentsüba anema Trinamool Congress-i Bodhbarnü New Delhi, Jantar Mantar nung ayongzükba longkak aitba sentong nung West Bengal Chief Minister aser Trinamool Congress tongti lenir, Mamata Banejee-i jembiba noksa nung angur.  

New Delhi, November 23 (Agencies): Bodhbarnü West Bengal Chief Minister, Mamata Banerjee-i sorkari sen tamshidak anentsüba anema Dehi yimti lenmangtem nung longkak aita liasü aser party pezüi la pusem.
Ato kilonser, Narendra Modi aija Mamata-i, iba sorkar ya anentsüla, kechiyong parnok ket nung linük kümzüka mali, ta ashi.
New Delhi, Jantar Mantar nung lokti den jembidang Mamata-i, tang sen tamshidak anentsüba ya ajanga BJP-i yimsü asütsü malang kümogo, ta ashi.
Iba sentong nung SP, JD-U, NCP aser AAP lenirtema liasü.
“Iba sorkar ya anentsüsa akumtsü. Ni iba o ya ashitsü arendaker- iba linük ya nü (Narendra Modi) ket nung kümzüka mali. Nai melungba aser jangraba ama nai inyaker,” ta Mamata-i ashi.
Banerjee-i, “Sen tamshidak anentsüba ajanga nüburtem nem timtem bener arutsüogo aser aluyimer, lanurtem, tetsürtem, aayangertem aser shishilembartem densema lokti telemsa ajak indang democratic temeten agientsüogo, iba dak alia linük rongsenkettsüng anendaktsüogo,” ta ashi.
BJP-i aniba sorkari sensakertem dang nungi rakzükraktemer ta shia lai, kechiba Swiss bank accounts alirtem anemabo meinyaker, ta asüngdang.
Ozüng tanak benokba atema taruba assembly election nung nüburtemi sorkar tashi nung aliba party dang lesson ka sayutsü, ta lai ashi.
“Shingaia BJP nem vote magütsütsü, ta ni züngbong ashir. Ni na (Modi) asübo ni nüburtem dang tatok meshila. Kechiba na tetokdak shisatsü alir? Nai linük nung alir ajak black marketer kaka kümdaktsüogo aser nabo nüsasa temeshi ama kümdaktsüogo,” ta Banerjee-i ashi.
Modi sa aija lai, pai aniba sorkarji Hitler danga tamajungba akümer asü ta bilemer, kechiba iba telemtetba magidang pai o melemtep, ta asüngdang.
Kasa sentong nung JD-U lenir, Sharad Yadav-ia sen anentsüba maparen ya ozüng dak apet inyak asü ta asüngdangba den külemi, iba telemtetba ajanga linük koma ajangzükdaktsütsüar Ato kilonseri Parliament nung metetdaktsütsüla, ta ashi.
“Koba ozüng kübok nai iba mera agi? Nisung kati meranga inyaker aazükba sen agizüktsüji pa temeten lir, ajisüaka nai ibaji nokdanger. Sen anentsüba ajanga tilateri shishilembartem jenjang raksatsüogo. Iba yagi black money koma anentsütsüar na Parliament-i arur rasa-a shiang,” ta Yadav-i ashi.
Bihar chief minister aser JD-U tongti, Nitish Kumar-ibo Centre sorkari sen tamshidak anentsüba atema Modi nem tenüngsang agüja jembiogo, ajisüaka tanü kasa party nungi lenir, Yadav-ibo Modi anema jembiogo.
Longkak aitba sentong nungsa Samajwadi Party (SP) lenir, Dharmendra Yadav, Aam Aadmi Party (AAP) lenir, Raghav Chadha aser National Congresss Party lenir, Majid Memon nungeria jembia liasü.
Mamata-isa, November 28 nü opposition party temi linük tesem ajaklen longkak aitbaji laia pusemtsü, ta metetdaktsü.
“Iba ya yimtenren nung tajangzük atema raraba ka masü. Ozü state nung nüburtem timtemdar. Linük tesem ajaklen nüburtem timtemdar. Parnok kongi aotsü? Iba rara ya sensakertem aser tepetzük tia nung alirtem atema raratsüba rara ka lir,” ta West Bengal Chief Minister, Mamata-isa metetdaktsü.