Mamata-i lungkak aitba anen

Kolkata, February 5 (Agencies): Mongulbarnü West Bengal Chief Minister Mamata Banerjee-i ‘Constitution aser democracy’ atema takok nguogo ta shia Kolkata nung lungkak aitba anen.
“Tanü Supreme Court-i obendang tajung ka agütsüogo. Taruba hopta onoki iba tebilemtsü Delhi-i bener aotsü” ta Mamata-i ashi.
CBI-i Kolkata Police Commissioner Rajeev Kumar anema ken o ka benokba angadangdang Supreme Court bench kati Rajeev Kumar dang Shillong nung CBI den ajuruteptsü atema tetuyuba agütsü.
SC bench-isa Kumar dang Saradha chit-fund ken o bushisüngdangba nung yariteptsü atema ashi.
Iba ken o bushisüngdangba mapang Kolkata Police aputsüba dena tanga tashiyim mapa kecha meinyaktsüla ta SC bench-isa metetdaktsü.
CJI Ranjan Gogoi-i aniba bench ajanga Kumar dang February 20 matongdang telangzüba ka agütsütsü osang metetdaktsü.
Külen, Mongulubarnü MHA-i Bengal sorkar dang Kolkata Police commissioner Rajeev Kumar anema mapa inyaktsü atema tetuyuba ka agütsüogo.