Kolkata, Feb. 07 (Agencies): West Bengal chief minister aser Trinamool tongti lenir, Mamata Banerjee-i March ita mezüng hopta nungi 2016 assembly election atema nüboyim sentong tenzüktsü.
Honibarnü Mamata-i South 24-Parganas district nungi lenirtem den senden ka mena liasü, aser iba senden nung, Feb. 12, 2016 nü Trinamool Bhavan nung Trnamool Congress party council senden amenba sülen kibok shia tua nüboyimtsü lemteta liasü.
“Union Budget senden tembangli CM-i March ita nungi nüboyim sentong tenzüktsü,” ta party osang ka ajanga ashi.
Ajisüaka küm 34 tashi Communist yimsüba lai kokteta 2011 küm May ita nung lai nüboyimba manener.
Iba mapang nungjagi tenzüka Trinamool Congress-i election aika nung takok nguyonga arur.
Honibarnü senden nung Mamata-i South 24-Parganas nungi party lenirtem dang, party teloktep indang mesüra tanga opposition party teloktep indang jembitsü asoshi mapang mali ta shiogo, ta osang angazüker.
Yaküm May ita nung municipal election tembangba sülen nungi joko ita ishika CM Mamata-i ketdangsertem senden tenüng atemer party senden aika ayonga kadagi.
February ita tatemlen election agitsü anogo sangdongtsü lia Mamata-i election maparen tenzükogo.
You must be logged in to post a comment Login